Leta y’u Rwanda yatangaje ko guhera ku itariki ya 01 Kanama 2020, ingendo z’indege zitwara abantu muri rusange zongera gusubukurwa ku bibuga byakira indege mu Gihugu. Abagenzi bose bashyiriweho amabwiriza ajyanye no kwirinda ikwirakwizwa ry’icyorezo cya Covid-19.

Mu itangazo Minisiteri y’ibikorwa remezo yashyize ahagaragara kuri uyu wa 04 Nyakanga 2020, ivuga ko baba abagenzi ndetse n’abakozi bakora mu ndege no kubibuga bagomba kubahiriza amabwiriza ya Leta agamije gukumira no kwirinda ikwirakwizwa rya Coronavirus.

Muri iri tangazo, amwe mu mabwiriza arebana n’abarebwa bose n’isubukurwa ry’izi ngenzo, asaba buri wese yaba umunyamahanga uje n’abari mu gihugu ko bose bagomba kuba bipimishije Covid-19 mbere y’amasaha 72 ko burira indege. Bagomba kandi kuba bafite icyemezo cyatanzwe n’ahapimirwa-raboratwari hemewe ku rwego mpuzamahanga, kigaragaza ko atarwaye iki cyorezo.

Uretse kuba abarebwa n’izi ngendo basabwa kuba bipimishije amasaha 72 mbere yo kurira indege kandi bakagaragaza icyemezo cy’ahantu hazwi, ku banyamahanga baje basabwa ko mu gihe bageze mu Rwanda bongera gupimwa ibisubizo bakabibona mu masaha 24.

U Rwanda, rwafunze ingendo z’indege zitwara abagenzi kuwa 20 Werurwe 2020, ariko izitwara imizigo zikomeza gukora. Rwafunguye kandi ingendo z’indege zihariye tariki 17 Kamena 2020. Mu rwego rwo kwitegura isubukurwa ry’izi ngendo zisigaje igihe kitagera ku kwezi, ibikenewe ku bibuga by’indege byamaze gutegurwa.

Munyaneza Theogene / intyoza.com