Ubutegetsi bwa Nijeriya bwatangaje ko abakobwa 82 muri 276 umutwe w’abarwanyi wa Boko Haram wari warashimuse barekure, byitezwe kandi ko kuri iki cyumweru bahura na perezida w’iki gihugu.

Aba bakobwa barekuwe kuri uyu wa gatandatu tariki ya 6 Gicurasi 2017 bari barafashwe bugwate n’umutwe w’abarwanyi ba Boko Haram babakuye ku kigo cy’ishuri cya Chibok aho bigaga mu mwaka wa 2014 mu kwezi kwa kane, batwawe ari 276 bose hamwe.

Ubuyobozi bw’ibiro bya Perezida wa Nijeriya bwasohoye itangazo rivuga ko aba bakobwa kuri iki cyumweru tariki ya 7 Gicurasi 2017 bagomba kwakirwa na perezida Muhammadu Buhari i Abuja.

Nyuma y’uko aba bakobwa barekuwe na Boko Haram, nkuko tubikesha BBC ngo bahise bakirwa n’igisirikare cya Nijeriya, kurekurwa kwabo ntabwo kwapfuye kuba nta mpamvu kuko ngo na Nijeriya bivugwa ko hari abarwanyi b’uyu mutwe yarekuye nubwo hatatangajwe umubare wabo.

Ubwo aba bana b’abakobwa bashimutwaga n’uyu mutwe wa Boko Haram, byateye ibibazo abatari bacye ku isi, imiryango mpuzamahanga iharanira uburenganzira bwa muntu, ibihugu n’abantu ku giti cyabo barahagurutse basaba irekurwa ryabo, mu kwezi kwa cumi k’umwaka wa 2016 uyu mutwe wari warekuye abakobwa 21 mubo wari washimuse.

Kanda hano ujye ubona amakuru y’iwacu kandi isaha ku isaha kuri Facebook no kuri twitter

Intyoza.com