Umunyamabanga Nshingwabikorwa w’Umurenge wa Nyagisozi, arashyirwa mu majwi n’abaturage ndetse na bamwe mu bakozi ayobora kubahohotera, kubakubita kugera n’aho bamwe mu baturage batangiye kujya kwishinganisha abandi bakaba bamubona bagahunga.

Umunyamabanga Nshingwabikorwa w’umurenge wa Nyagisozi ho mu  karere ka Nyanza, bwana Alfred Nsengiyumva nti yorohewe na bamwe mu baturage ayobora ndetse n’abakozi bamushinja kubahohotera, kubakubita kugeza ubwo bamwe batangiye kwishinganisha ndetse abandi ngo bakaba basigaye bamuhunga iyo bamubonye.

Abaturage batari bacye baganiriye n’ikinyamakuru intyoza.com muri uyu murenge, bahamya ko Gitifu atabayobora nk’umuyobozi ahubwo ko abahungabanya, hari ndi abamushinja kubohereza mu kigo ngororamuco ( transit center) mu buryo bugamije kubumvisha no kubereka ko ngo abafiteho ububasha.

Ignance Nsengimana, akuriye abacuruzi mu murenge wa Nyagisozi, uretse kuba akuriye abacuruzi, ari muri  komite zitandukanye zigira aho zihurira n’imiyoborere, yabwiye intyoza.com ko akarengane kavugwa n’abaturage ari ukuri. Avuga ko nawe ubwe yabikurikiranye, ko nawe ubwe yagiye amutoteza kenshi ndetse akaba yaragiye abishyikiriza inzego zitandukanye kugera ku karere ariko ugasanga nta gihinduka.Akomeza avuga ko uyu Gitifu ari umuntu urwara inzika ku buryo umuturage usanzwe cyangwa umucuruzi yishyizemo akoresha ibishoboka byoze agafungwa cyangwa se akoherezwa mu kigo cyakira inzererezi kiri mu murenge wa Ntyazo( transit center).

Mariko Hagenimana, umuhinzi akaba anikorera amasambusa ndetse akavuga ko asorera ibyo akora, yabwiye intyoza.com  ko afite ikibazo cyo gutotezwa n’uyu Gitifu, ko aherutse kumukubita ndetse akaza iwe akangiza ibyo akora, sibyo gusa kuko ngo yanangije ibitari bike mu bikoresho byo murugo rwe bikarangira amujyanye mu nzererezi umugore n’umuryango batazi aho ajyanywe.

Fidel Mutagomwa, umwe mubaturage wakubiswe ndetse akajyanwa munzererezi atazi icyo azira nkuko yabitangarije intyoza.com, avuga ko Gitifu na Polisi baje iwe mu ma saa cyenda z’ijoro bakamutwara.

Mukiza Jean Rukema, umucuruzi akaba umuturage muri uyu murenge yabwiye intyoza.com ko nyuma yo kumutera iwe mu ma saa cyenda z’ijoro, Gitifu ari kumwe na komanda wa Polisi bakamutwara mu nzererezi mu murenge wa Ntyazo ngo kuva yagaruka yahise ahagarika ubucuruzi kuko ngo yashatse no guhunga umurenge bikanga, avuga kandi ko yamaze kwandikira inzego zitandukanye yishinganisha anasaba kurenganurwa.

Umwe mu babyeyi( umugore) waganiriye n’intyoza.com yavuze ko nawe umwana we w’umunyeshuri yatwawe mu nzererezi akuwe murugo ari kumwe na mwene nyina akajyanwa batamubwiye, avuga ko umwe yaje ariko undi bakaba bakimufite atazi n’amakuru ye.

Umukozi muri uyu murenge ushinzwe iby’ubutaka, we yabwiye intyoza.com ko aherutse gukubitwa n’uyu mu Gitifu ndetse akamusohora mu nama ndetse akamucira umwenda. Avuga ko yiyambaje akarere kakaza ngo kabunge ariko bikarangira gitifu amubwira ko agiye kumushakira Dosiye akazirukanwa.

Ku makuru kandi intyoza.com ifitiye gihamya, avuga ko hari umwarimu mu kigo cy’amashuri abanza muri uyu murenge Gitifu aherutse gupfukamisha no gukubitira imbere y’abanyeshuri.

Kuri uyu murenge, ubwo intyoza.com yahageraga kuri uyu wa Kane tariki 26 Ukwakira 2017 mu masaha y’igicamunsi, yahasanze inka 2 hamwe n’intama eshatu abaturage bavuga ko bihamaze igihe kitari hasi y’ukwezi. Bavuga ko bitagakwiye gufunga inka ngo kuko nta kosa ry’inka, ngo bibaye ari ugufunga hafungwa nyirazo.

Gitifu Nsengiyumva, yabwiye intyoza.com ko kubavuga ko abajyana mu nzererezi ngo nta kigo cyazo agira, ngo ibyo byabazwa Akarere na Polisi. Yabwiye intyoza.com kandi ko abavuga ko abahohotera ari ikinyoma.

Abaturage batari bacye baganiriye n’intyoza.com, baba abari muri iyi nkuru n’abandi dufitiye amajwi, bahuriza ku kuvuga ko Gitifu Alfred Nsengiyumva abahohotera abakangisha ko ngo nta wamukoraho ngo kuko hari amasano afitanye na Minisitiri Kaboneka. Abaturage, bavuga iby’amakoperative yashenye, iby’amafaranga batiziye irengero yatanzwe ngo haguwe moto n’ibindi. Bavuga ko basigaje kujya kwa Minisitiri abakangisha bakamubaza niba koko aricyo yamubahereye cyangwa se bakajya kureba Perezida wa Repubulika y’u Rwanda.

Munyaneza Theogene / intyoza.com