Ugeze ahari amacumbi y’abaganga bakora mu bitaro bya Remera-Rukoma usanganirwa n’umwanda. Ubuyobozi bw’ibitaro buti ntacyo tutakoze ngo tubagire inama, ubu turasaba ubuyobozi bw’umurenge kubaca amande, nti twabaha inzu ngo tunabakorere  isuku ( urihera ijisho n’amwe mu mafoto).

Abaganga bakora mu bitaro bya Remera-Rukoma baba mu macumbi agaragaramo umwanda ukabije. Ubuyobozi bw’ibitaro bakorera buvuga ko iki kibazo bagomba kukirengera kuko butabaha amacumbi ngo bujye no kubakorera isuku aho baba, ahubwo ngo bwasabye ubuyobozi bwa Leta kujya guca amande aba baganga.

Umuyobozi w’Ibitaro bya Remera-Rukoma, Dr Jaribu Theogene yakuye amaboko kuri aba banga asaba ubuyobozi kubaca amande( ibihano kubera umwanda wabo). Yabwiye intyoza.com ati ” Twabahaye amazu yo kubamo, twababwiye ko bagomba kujya bikorera isuku bitari ibyo umurenge ukabaca amande.”

Akomeza agira ati ” Ntabwo dukorera abaganga isuku, dukorera abarwayi. Ni mu isambu yacu nk’ibitaro ariko ni abakozi bacu ku giti cyabo bafite umwanda, ntabwo ari twe nk’ibitaro.”

Dr Jaribu, avuga ko ikibahangayikishije ari ukubaka uruzitiro rw’aho aya macumbi ari kuko narwo rwaguye ndetse bikaba bigaragara ko ari ikibazo barimo gushakira ubushobozi ngo gikemuke. Si kuri aya macumbi gusa kandi adafite uruzitiro kuko ngo n’ibitaro bitazitiye hose.

Nkurunziza Jean de Dieu, Umunyamabanga Nshingwabikorwa w’Umurenge wa Rukoma yemereye intyoza.com ko ikibazo cy’uyu mwanda w’aho abaganga baba bakizi nk’ubuyobozi, ko ndetse babasuye bakaganira nabo kenshi babasaba kugira isuku.

Avuga kandi ati ” ikibazo turakizi, twakiganiriye n’abaganga ubwabo tubagira inama ariko ntacyo bahinduye. Twaganiriye n’ubuyobozi bw’ibitaro butubwira ko bwahaye abaganga inzu babamo ko batanabakorera isuku aho baba. Ahubwo badusabye ko tubaca amande ari nacyo kigiye gukorwa.”

Ihere amaso amwe mu mafoto agaragaza umwanda w’aho aba baganga baba:

Munyaneza Theogene / intyoza.com