Ubwo bene Rwigara Assinapol barimo Diane Shima Rwigara na nyina umubyara Mukangemanyi Adeline Rwigara bageraga imbere y’urukiko rukuru kuri uyu wa Kabiri Tariki 2 Ukwaki 2018 ku burana ku ifungwa n’ifungurwa ry’agateganyo, barusabye kurekurwa by’agateganyo. Icyifuzo cyabo cyatewe utwatsi n’ubushinjacyaha bwavuze ko nta shingiro gifite, ko kije impitagihe.

Diane Shima Rwigara na nyina umubyara, Mukangemanyi Adeline Rwigara basubiye imbere y’urukiko rukuru mu gitondo cy’uyu wa kabiri tariki 2 Ukwakira 2018 baburana ku ifungwa n’ifunyurwa ry’agateganyo. Basabye urukiko kurekurwa bakajya baburana badafunze, ariko ubushinjacyaha bwateye utwatsi iki cyifuzo.

Ubwo bari imbere y’urukiko rukuru, Uwunganira Diane Rwigara mu matebeko, Me Buhuru Pierre Celestin yabwiye urukiko ko inzitizi zatangwaga n’ubushinjacyaha z’uko uwo yunganira abaye akurikiranywe ari hanze yabangamira iperereza nta zigihari ngo kuko nta rikimukorwaho. Yasabye ko umukiriya we yarekurwa agakurikiranwa adafunze.

Me Buhuru, asaba ko urukiko rwaha agaciro icyifuzo cy’uwo yunganira mu mategeko, yagaragaje ko ingingo batanze ziri mu gitabo cy’amategeko zishimangira ko kurekurwa k’umukiriya we, ariryo hame.

Ku rundi ruhande, Umunyamategeko wunganira Mukangemanyi Adeline( nyina wa Diane) nawe yunze mu rya mugenzi we maze asaba urukiko ko umukiriya we akwiye kurekurwa agakurikiranwa ari hanze ngo kuko inzitizi zari zatanzwe n’ubushinjacyaha buvuga ko yabangamira iperereza abaye akurikiranywe ari hanze zitagihari ngo kuko ntarikimukorwaho.

Uretse kuba Adeline Mukangemanyi Rwigara ngo atagikorwaho iperereza, ikinyamakuru ukwezi dukesha iyi nkuru kivuga ko umwunganira mu mategeko yanagaragaje ko gusaba irekurwa ry’agateganyo ry’umukiriya we ngo anabishingira ku ihame ry’ubutabera rivuga ko ukekwaho icyaha akurikiranwa adafunze.

Mu gihe ubushinjacyaha bwahabwaga ijambo, bwabwiye urukiko ko ingingo abunganira mu mategeko abaregwa batanze bazemera, ariko ngo mu ngingo ya 121 hari aho ivuga ko impamvu zo kurekurwa zemerwa gusa iyo urubanza rutarajya mu mizi. Ku bw’iyo mpamvu, busanga ubu busabe ngo buje impitagihe.

Rumaze kumva impande zombi, urukiko rwatangaje ko kuri uyu wa gatanu tariki 5 Ukwakira 2018 aribwo ruzatangaza umwanzuro warwo, mu gihe urubanza ruzakomeza tariki ya 7 Ugushyingo 2018.

intyoza.com