Mu gihe cy’amezi ajya kugera kuri atandatu Abesamihigo ba Kamonyi begukanye Inka y’Ubumanzi bakesha itegurwa n’ishyirwa mu bikorwa neza ry’Urugerero ruciye ingando, aho bahize utundi turere tw’Igihugu, kuri uyu wa 05 Ukuboza 2019 bashyikirijwe Inka y’Ubumanzi. Ni igikorwa cyabereye mu Murenge wa Kayenzi.

Inka y’Ubumanzi yashyikirijwe Abesamihigo, ije nyuma y’uko kuwa 23 Kamena 2019 mu Muhango wabereye mu murwa mukuru w’Igihugu aka Karere kari kahigitse utundi mu bikorwa byo gutegura no gukurikirana urugerero ruciye ingando rwa 2019 bityo bakegukana Inka y’Ubumanzi.

Mugushyikiriza iyi Nka y’Ubumanzi Abesamihigo, Komiseri Rugemintwaza muri Komisiyo y’Itorero ry’Igihugu, yagejeje ku Besamihigo Ubutumwa bwo kubashimira ku bikorwa byakozwe mu cyumweru cy,ubwitange bategura kandi bagakurikirana neza Urugerero ruciye Ingando.

By’umwihariko, Komiseri Rugemintwaza yashimiye uko bateguye bakanacunga neza Urugerero ruciye ingando bityo akaba yaje kubashyikiriza Inka y’Ubumanzi begukanye  nk’Indashyikirwa.

Komiseri Rugemintwaza, yibukije ko uyu muco wagarutse buri wese akwiye gukomeza kuwushyigikira. Yasabye Abanyakamonyi(Abesamihigo) gukokeza kuba indashyikirwa mu Rugerero rwo kwigira no kwihesha agaciro.

Tuyizere Thaddee, Umuyobozi w’Akarere ka Kamonyi wungirije ushinzwe iterambere ry’Ubukungu, yashimiye Perezida Paul Kagame we wagaruye Umuco, akagarura mu Rwanda Itorero ry’Igihugu, uyu munsi hakaba hari Itorero ry’Umudugudu, hakaba Uruberero, aho Umunyarwanda atorezwa indangagaciro na Kirazira, agatozwa gukunda Igihugu, Gukunda umurimo no kuwunoza, kwishakamo ibisubizo n’ibindi byiza bimufasha gukora ajya mbere kandi aharanira kubaka Igihugu cyamubyaye.

Tuyizere, yijeje Ubuyobozi bw’Itorero ry’Igihugu-NIC ko Abesamihigo biteguye gukomeza gutoza Abanyarwanda by’umwihariko urubyiruko, ko kandi biteguye kwesa Imihigo. Ati ” Turiteguye n’ubu Urugerero ruciye ingando rwatangira, turi kumwe n’abafatanyabikorwa bacu twiteguye kuzesa imihigo y’Urugerero”.

Urugerero ruciye ingando rwatangiye mu gihugu tariki 12 gicurasi rusozwa tariki 22 Kamena 2019. Mu bikorwa by’ingenzi byakozwe n’Intore zari ku rugerero mu karere ka kamonyi harimo; Guhanga umuhanda ureshya na Kilometero 8,5 bari bafite umuhigo wa Kilimetero 5. Bubatse inzu z’amatafari ahiye zo gutuzamo imiryango 4 zizwi nka two in one, bubaka uturima tw’igikoni, bacukura imirwanyasuzi, Bubaka Ibiro by’Umudugudu wa Remera n’ibindi bikorwa byo kuzamura imibereho myiza y’abaturage n’iterambere ryabo.

Soma inkuru bijyanye hano. Nushaka no kubona inkuru zanditswe kuri uru rugerero ruciye Ingando 2019 ujye ku intyoza.com wandike ahashakirwa ngo”Urugerero ruciye ingando”: Kamonyi: Akarere kaje ku isonga gahigitse utundi mu bikorwa by’Urugerero ruciye ingando

Munyaneza Theogene / intyoza.com