Uhuru Kenyatta, Perezida w’Igihugu cya Kenya mu gitondo cyo kuri uyu wa Gatatu tariki 22 Mata 2020 yasabye ko abantu bagera kuri 50 bagaragaye mu mafoto batoroka ibigo bashyizwemo kubwo gukekwaho icyorezo cya Covid-19 bashakishwa bagasubizwa muri ibi bigo kugeza barangije igihe cyateganijwe bagomba kuhamara.

Ibinyamakuru bikorera mu Gihugu cya Kenya bitangaza ko abantu bagera kuri 50 aribo batorotse, ariko Leta ntabwo irabasha gutangaza umubare nyakuri w’abavugwa ko batorotse muri ibi bigo.

Perezida Uhuru Kenyatta, yavuze ko Leta ifite imyirondoro y’aba bantu bose batorotse, ko kandi izabafata bagasubizwa mu bigo bavuyemo.

Ku mugoroba wo kuri uyu wa kabiri Tariki 21 Mata 2020 nibwo Minisitiri w’Ubuzima yatangaje ko Igipolisi kirimo gukora iperereza kubirebana n’uku gutoroka.

Mu gihugu cya Kenya, hari abantu basaga 400 bashyizwe ku ngufu muri ibi bigo, bamwe muri aba nkuko BBC dukesha iyi nkuru ibivuga, ni abarenze ku mabwiriza ya “Guma mu rugo”, abandi ni abasanzwe mu tubare banywa kandi twarafunzwe.

Mu bandi bari mu bigo nk’ibi, hari abinjiye mu gihugu nyuma y’uko hafashwe icyemezo gihagarika urujya n’uruza rw’indege zitwara abagenzi. Abantu bari muri ibi bigo, binubira ko ngo bafashwe nabi cyane, bakavuga ko bafite ubwoba ko bashobora no kuhandurira CoronaVirus.

Munyaneza Theogene / intyoza.com