Nyuma y’aho Perezida John Pombe Magufuri wa Tanzania mu minsi ishize atangarije ko azohereza indenge muri Madagascar kuzana umuti Gakondo w’ibyatsi watangajwe na Perezida Andry Rajoelina ko uvura Coronavirus, kuri uyu wa 08 Gicurasi 2020 uyu muti wageze mu Gihugu cya Tanzania, batangiye kuwunywa.

Uyu muti Gakondo uzwi ku izina rya Covid-Organics cyangwa CVO mu magambo y’impine, ukozwe mu byatsi birimo n’ibyo mu bwoko bw’inyabarasanga n’ibindi byo muri Madagascar. Perezida w’iki Gihugu aherutse gutangaza ku mugaragaro ko uvura Coronavirus.

Minisiteri y’ububanyi n’amahanga ya Tanzania yatangaje ku rubuga rwa Instagram amafoto y’iryo hererekanya ry’uwo muti. Ifoto imwe igaragaza Minisitiri wo muri Madagascar ahereza ipaki y’umuti mugenzi we w’ububanyi n’amahanga wa Tanzania, Palamagamba Kabudi, mu gihe indi ibagaragaza bombi bawusomaho.

Ishami ry’umuryango w’abibumbye ryita ku buzima (OMS/WHO) ryamaganye ibivugwa na Madagascar ko uwo muti yakoze ushobora kuvura abarwayi ba Covid-19, indwara y’ubuhumekero iterwa n’ubu bwoko bushya bwa coronavirus.

Ku wa kane ushize nkuko BBC dukesha iyi nkuru ibivuga, umukuru wa OMS ishami ry’Afurika yaburiye ibihugu kwirinda gukoresha imiti gakondo mbere yuko ikorerwa igeragezwa ku barwayi rishingiye ku buhanga bwa siyansi.

Mu kiganiro n’abanyamakuru, Dr Matshidiso Moeti yagize ati:”Mu mwaka wa 2000, Leta zacu ziyemeje, binyuze kuri ba minisitiri bazo b’ubuzima, ko zizafata imiti gakondo n’indi miti ikanyuzwa mu mageragezwa [ya siyansi] ku barwayi”.

“Rero nifuzaga gusaba no kujya inama ko iki cyemezo cyafashwe na za Leta kigomba gukurikizwa”.

Tanzania ni kimwe gusa mu bihugu byinshi byo ku mugabane w’Afurika byamaze gutumiza uwo muti. Hari ibindi bihugu biteganya kuwutumiza, aho ku ikubitiro ibyamenyekanys birimo nka Repubulika ya Demokarasi ya Kongo, Guinea-Bissau, Equatorial Guinea na Liberia.

intyoza.com