Abagore n’abakobwa bakora umwuga wo kwicuruza, aba bazwi ku izina ry’ “ Indaya” mu gihugu cya Zambia barashimirwa na Minisitiri w’Ubuzima w’iki Gihugu uruhare bari kugira mu gufasha Leta gukurikirana abakekwaho icyorezo cya Covid-19. Ni nyuma y’aho abarwayi 76 muri 85 bashya ba Covid-19 babonetse mu mujyi witwa Nakonde uherereye ku mupaka, ahabarizwa indaya nyinshi.

Minisitiri w’Ubuzima witwa Chitalu Chilufya, avuga ko abarwayi bashya 76 muri 85 bamenyekanye ko banduye iki cyorezo, babonetse muri uwo mujyi kandi bari Indaya n’abashoferi b’amakamyo. Izi ndaya nizo zafashije Leta kubona amakuru mpamo.

Mu kubashimira yagize ati “ Indaya zaradufashije cyane mu kuduha amakuru yose dukeneye”.

Mu Gihugu cya Zambia, nkuko BBC dukesha iyi nkuru ibitangaza kugeza magingo aya hamaze kuboneka abantu 267 banduye Covid-19, hari kandi abantu barindwi iki cyorezo cyishe.

Mu cyumweru gishize, Perezida Edgar Lungu yatangaje koroshya ingamba zari zarafashwe, hafungurwa ibikorwa bimwe na bimwe nyuma y’ukwezi ibintu byose byarahagaritswe.

Minisitiri Chilufya yavuze iki?

Bwana Chilufya yagize ati: “Ibintu biracyifashe nabi muri Nakonde”. Yongeraho ko ariyo mpamvu Perezida Lungu yategetse ko umupaka uba ufunzwe.

Nakonde ikunda kuba irimo amakamyo menshi ava muri Zambia andi yinjira ava muri Tanzania nk’uko umunyamakuru wa BBC i Lusaka abivuga. Avuga ko abashoferi b’amakamyo bafatwa nk’abugarijwe cyane no kwandura iki cyorezo kuko bahagarara mu duce twinshi kandi bazwiho gukora imibonano mpuzabitsina n’abantu benshi.

Bwana Chilufya yagize ati: “Bari [indaya] kudufasha cyane mu iperereza ryacu kandi ntabwo dushaka ko bakorerwa ivangura. Bari kudufasha gushakisha abakekwa ko banduye.

“Hari umwe muri bo twabonye afite ibimenyetso atubwira umukiriya we utwara ikamyo wo mu kindi gihugu anaduha numero ye ya telephone. Twarayihamagaye batubwira ko uwo muntu arwaye Covid-19”.

Abategetsi mu karere ka Afurika y’iburasirazuba nabo baraganiriye nyuma y’uko abashoferi b’amakamyo bibonetse ko bari mu bari gukwirakwiza iki cyorezo mu karere.

Perezida Yoweri Museveni wa Uganda aheruka gutangaza ko yahamagaye bagenzi be bo muri aka karere by’umwihariko ku kibazo cy’abashoferi b’amakamyo.

Uganda yategetse ko aba bashoferi bazajya babanza bagasuzumwa mbere yo kwinjira muri iki gihugu, kandi babujijwe kugira aho bacumbika muri Uganda.

Mu Rwanda, imibare yatanzwe na minisiteri y’ubuzima yerekana ko mu karere ka Kirehe gahana umupaka na Tanzania hari umubare munini w’abanduye Covid-19, ahanini kubera abashoferi b’amakamyo, abakorana nabo n’abo bahura nabo.

Hafashwe icyemezo ko nta mushoferi wongera kwinjira mu Rwanda, ikamyo azanye yakirirwa ku mupaka n’undi mushoferi wo mu Rwanda akageza ibyo itwaye aho bigiye akayimugarurira.

intyoza.com