Abakozi bo mu rwego rw’Ubuvuzi mu gihugu cya Mexique, bagiye mu mihanda kuri uyu wa 26 Gicurasi 2020, basaba Leta ibikoresho bihagije birimo n’ibibafasha kwikingira mu gihe bavura abarwayi ba Covid-19.

Aba bakozi bigaragambije, bafunze imihanda mu murwa mukuru w’icyo gihugu, bashinja ubutegetsi bw’Igihugu cyabo gushyira ubuzima bwabo mu kaga mu kubaha ibikoresho bitujuje ubuziranenge.

Baravuga ko ubutegetsi bubasaba gukoresha impuzankano n’udupfukamunwa byakoreshejweho, kandi ibyo bimaze kuviramo bagenzi babo kwandura icyorezo cya Virusi ya Corona bamwe muri bo bakitaba Imana.

Ubuke bw’abaganga muri icyo gihugu nkuko ijwi rya Amerika dukesha iyi nkuru ribivuga, burabasaba gukomatanya kuvura abarwayi no kwigisha abanyeshuri ba kaminuza bimenyereza kuvura.

Muri Mexico hamaze kwemezwa abarwayi ba Covid 19 barenga ibihumbi 70 mu gihe imaze guhitana abagera ku 7,300. Abenshi mu bayirwaye babarizwa mu murwa mukuru Mexico City utuwe n’abantu benshi.

intyoza.com