Derek Chauvin wirukanwe mu gipolisi nyuma yo kwica umwirabura George Floyd mu mujyi wa Minneapolis, araregwa kwica umugabo udafite intwaro George Floyd. Bwa mbere yagejejwe imbere y’urukiko ejo ku wa 08 Kamena 2020, urukiko rwavuze ko ingwate yo kugira ngo arekurwe by’agateganyo ari miliyoni 1,25 y’amadorari.

Ubwo yagezwaga imbere y’urukiko, abashinjacyaha bavuze ko “ibyo aregwa bikomeye” kandi ko n’umujinya wa rubanda ari impamvu yo kuba iyo ngwate ye ihera nibura kuri miliyoni imwe y’amadorari.

Bwana Chauvin, araregwa ubwicanyi bwo mu cyiciro cya kabiri. Abandi bapolisi batatu bari kumwe nawe nabo bararegwa ubufatanyacyaha no kureberera. Ubwicanyi bwakorewe George Floyd, bwateje imyigaragambyo ahantu hatandukanye ku isi by’umwihariko muri Amerika no gusaba impinduka mu rwego rwa polisi mu iki Gihugu.

Ni ibihe byaha uwishe Floyd aregwa?

Aregwa ibyaha bitatu: ubwicanyi butagambiriwe bw’icyiciro cya kabiri, ubwicanyi bw’icyiciro cya gatatu n’ubuhotozi bw’icyiciro cya kabiri. Igihano cyabyo gishobora kugera ku myaka 40, 25 na 10 y’igifungo uko bikurikiranye.

Hari ibindi birego bishobora kuzanwa ariko biboneka ko ashobora kutazaregwa ubwicanyi bwo mu cyiciro cya mbere kuko abamushinja byasaba ko berekana ko yari yabanje gucura uwo mugambi, kuwugerageza n’impamvu nkuko bivugwa n’ibiro ntaramakuru Associated Press.

Inama y’ubutegetsi y’umujyi wa Minneapolis yatoye itegeko ryo guca uburyo polisi yari yemerewe bwo gufata ukekwa agatabwa ku munigo no kumushinga ivi ku ijosi, banasabye ko habaho gusesa igipolisi.

Mu Bufaransa, ahabaye imyigaragambyo ya ‘Black Lives Matter‘ (ni ukuvuga ngo ubuzima bw’abirabura bufite agaciro) mu mpera y’icyumweru gishize, Minisitiri w’ubutegetsi bw’igihugu Christophe Castaner yatangaje ko polisi itazongera gufata abantu mu ijosi.

Abaharanira uburenganzira bwa muntu mu Bufaransa bavuga ko mu mwaka ushize gusa hari ibirego 1,500 byatanzwe birega abapolisi ubugizi bwa nabi.

Hagati aho, i Houston muri leta ya Texas aho Bwana Floyd yakuriye mbere yo kwimukira i Minneapolis, ejo kuwa 08 Kamena 2020 basezeyeho umurambo we mu gihe cy’amasaha atandatu aho wari washyizwe mu rusengero rwitwa The Fountain of Praise church.

Uyu munsi nkuko BBC dukesha iyi nkuru ibitangaza, biteganyijwe ko Floyd aza gushyingurwa n’abagize umuryango we aho muri Houston. Imihango yo kumusezeraho yabaye kandi muri Minneapolisi na North Carolina aho yavukiye.

Joe Biden, umukandida w’ishyaka ry’abademokarate ku mwanya wa perezida, ejo yagiye guhura n’abo mu muryango wa Floyd i Houston ngo abihanganishe.

Mu rukiko byagenze gute kuri uyu uregwa kwica Floyd?

Bwana Chauvin, wamaze imyaka 19 mu gipolisi, ntabwo yari ari mu cyumba cy’urukiko ahubwo yari muri gereza hakoreshwa ikoranabuhanga ry’amashusho. Mu iburanisha ryamaze iminota 15 ntacyo yigeze avuga, yari yambitswe amapingu n’umwambaro w’ibara rya ‘orange‘ yicaye imbere y’ameza matoya.

Umucamanza Jeannice M Reding yavuze ko ingwate yo kugira ngo arekurwe by’agateganyo ayishyize kuri miliyoni 1,25 y’amadorari.

George Floyd, ni umwirabura w’umunyamerika w’imyaka 46 wishwe kuwa 25 Gicurasi 2020 na Polisi yari mu kazi ubwo bamuhagarikaga bakamuryamisha hasi, umwe muri bane bamuhagaritse akamushinga ivi ku ijosi kugereza ashizemo umwuga nkuko amashusho yafashwe yabigaragaje.

Munyaneza Theogene / intyoza.com