Uyu ni umuti wo mu bwoko bw’iyo bita steroid, watangiye gukoreshwa kuva mu myaka ya 1960 mu koroshya ‘inflammation’ (ugenekereje mu kinyarwanda ni; ukubabuka imbere mu mubiri) no kuri kanseri zimwe na zimwe.

Kuva mu 1977, ishami ry’umuryango w’Abibumbye ryita ku buzima-OMS/WHO ryashyize uyu muti ku rutonde rw’imiti y’ingenzi mu kuvura indwara nyinshi, ubu ni umiti wemewe gukorwa ku bwinshi kandi uboneka ku giciro giciriritse mu bihugu byinshi.

Emile Karasira umukozi muri farumasi yigenga mu Rwanda, yabwiye BBC dukesha iyi nkuru ko dexamethasone ubusanzwe iba mu moko y’ibinini, umuti batera mu rushinge, umuti bisiga ku mubiri ndetse n’uwo batonyangiriza mu maso.

Bwana Karasira, avuga ko ari umuti uboneka muri farumasi zo mu Rwanda, no muri farumasi z’ibitaro kandi “ugura amafaranga macye cyane“. Agira ati: “Ntabwo ari umuti ubusanzwe ukoreshwa cyane, gusa ukoreshwa nka antidote, bawuha nk’umuntu wariye uburozi, umerewe nabi kubera indi miti, mbese ufasha mu gukura imyanda mu mubiri”.

Kuba ubushakashatsi burimo kuwukorwaho bwemeza ko uvura abarwayi barembejwe na Covid-19, uyu mukozi avuga ko bishoboka kuko uyu muti ufasha abantu mu gihe batabasha guhumeka neza iyo barembejwe n’ikindi kintu.

OMS/WHO, ivuga ko yagaragarijwe n’abashakashatsi iby’ibanze byavuye mu igeragezwa ryawo, ko itegereje guhabwa amakuru arambuye y’ubu bushakashatsi mu minsi iri imbere.

OMS ivuga ko izakora isesengura ry’inyongera kugira ngo imenye neza uburyo uyu muti uvura iki cyorezo maze inagene uko wakoreshwa mu kukivura.

Mu kwezi kwa kane k’uyu mwaka wa 2020, OMS yatangaje ko iri gukorana na Leta ya Madagascar mu gusuzuma umuti wa Covid-Organic, Leta y’iki gihugu yatangaje ko uvura Covid-19, ngo irebe niba uyivura koko.

Inganda zikora imiti n’izikora inkingo zimaze igihe zikora cyane, zigerageza kubona umuti cyangwa urukingo rw’iki cyorezo. Inkingo zimwe ziri mu magerageza mu bihugu bya Amerika, Ubwongereza, Australia n’ahandi.

Munyaneza Theogene / intyoza.com