Umucamanza wari uyoboye urubanza rwa Vital Kamerhe wahoze akuriye ibiro bya Perezida wa Repubulika iharanira Demokarasi ya Kongo, aherutse gupfa bivugwa ko azize indwara y’umutima. Mubimaze kugaragazwa n’ibizamini byakorewe ku murambo, uyu mucamanza ngo yishwe urupfu rubi ruturuka ku byuma cyangwa ibisa nabyo yajombaguwe mu mutwe nkuko byatangajwe na Minisiteri y’Ubutabera.

Minisitiri w’ubutabera Célestin Tunda Ya Kasende, yavuze ko ubu hatangiye iperereza ku bwicanyi bwakorewe uyu mucamanza. Mu kwezi gushize kwa Gicurasi 2020, Polisi yatangaje ko umucamanza Raphaël Yanyi yishwe n’indwara y’umutima.

Yari amaze igihe ari umucamanza ukuriye iburanisha mu rubanza Vital Kamerhe aregwamo ibyaha bya ruswa. Ariko ibizamini byakorewe ku murambo we ngo hamenyekane icyamwishe, ubu byagaragaje ko “yazize urupfu rubi, rutewe n’ibintu bityaye yakubiswe cyangwa bimeze nk’ibyuma, byinjijwe mu mutwe we“, nkuko Minisitiri Célestin Tunda Ya Kasende yabibwiye ibiro ntaramakuru Reuters kuri uyu wa kabiri tariki 16 Kamena 2020.

Umurambo w’umucamanza Yanyi wanagaragaje ibimenyetso by'”imiti y’uburozi iri mu ngano itica“, nkuko minisiteri y’ubutabera yabivuze.

Bwana Vital Kamerhe w’imyaka 61 y’amavuko, wahoze ari ingenzi muri Leta ya Perezida Félix Tshisekedi, ashinjwa gukoresha nabi imari ya Leta irenga miliyoni 50 z’amadolari y’Amerika. Ahakana ibyo aregwa byose, akavuga ko nta kibi yakoze.

Abamushyigikiye, BBC dukesha iyi nkuru itangaza ko bemeza ko urubanza rwe ari urwa politike, rugamije kumubuza kuziyamamaza ku mwanya wa perezida mu gihe kiri imbere.

Vital Kamerhe ni we munyapolitike wo ku rwego rwo hejuru cyane wa mbere ushinjwe ibyo byaha muri iki gihugu. Urubanza rwe rwakomeje nta mucamanza w’umusimbura ururimo nyuma y’urupfu rwa Bwana Yanyi.

Photo/Actualite.cd

Munyaneza Theogene / intyoza.com