Umushinjacyaha wa Irani yasohoye impapuro zishakisha Perezida Trump wa Leta zunze Ubumwe za Amerika ngo atabwe muri yombi, yaba akiri ku butegetsi cyangwa se yarabuvuyeho. Arashinjwa ibyaha bitandukanye birimo n’iyicwa ry’umujenerali wa Irani. 

Leta ya Irani yasohoye impapuro zo guta muri yombi Perezida wa Leta zunze ubumwe z’Amerika, Donald Trump, “yaba akiri ku butegetsi cyangwa yarabuvuyeho,”. We n’abandi bantu 35 bashinjwa kugira uruhare mu iyicwa rya General Qassem Soleimani wa Irani.

Uyu Mujenerali, yarashwe n’indege itagira umuderevu “drone” mu kwezi kwa mbere kwa 2020 ari mu rugendo i Bagdad, umurwa mukuru wa Iraki.

Nk’uko umushinjacyaha mukuru wa Teherani, Ali Alqassi-Mehr, abitangaza, bariya bantu 35 barimo “abanyapolitiki n’abasilikali bo muri Leta zunze ubumwe z’Amerika no mu bindi bihugu.” Ariko ntasobanura ibyo ari byo. Avuga ko akurikiranye bose ku “byaha y’ubuhotozi n’iterabwoba.”

Irani yasabye inkunga ya Polisi mpuzamahanga Interpol. Ariko iyi, mu itangazo yashyize ahagaragara, ivuga ko “ikurikije ingingo ya 3 y’itegeko shingiro ryayo idashobora kwivanga mu bibazo bya Politiki, igisilikali, amadini, n’amoko.”

Ijwi rya Amerika dukesha iyi nkuru, ritangaza ko intumwa yihariye ya Leta zunze ubumwe z’Amerika ku bibazo bya Irani, Brian Hook, avuga ko “ibyo Irani yatangaje nta gaciro bifite”.

Munyaneza Theogene / intyoza.com