Christopher Wray, ukuriye ibiro bishinzwe iperereza ku byaha imbere muri Amerika-FBI, kuri uyu wa Kabiri tariki 07 Nyakanga 2020 yavuze ko ubutasi no kwiba bikorwa na leta y’Ubushinwa ari “ikibazo gikomeye kandi kirambye” ku hazaza ha Amerika. Yashinje ubushinwa gukora ubutasi bugiye kure mu by’ubukungu, amakuru, kwiba amafaranga n’ibindi bikorwa bitemewe bya Politiki.

Ubwo yari mu kigo cy’ubushakashatsi Hudson Institute i Washington, Christopher Wray yavuze ko Ubushinwa bwatangiye bwibasira Abashinwa baba mu mahanga, bubahatira gutaha, kandi ko buri kubangamira ubushakashatsi bwa Amerika kuri coronavirus.

Yagize ati: “Ubushinwa bwashyize imbaraga zose zishoboka mu kuba igihugu gikomeye cyane cyonyine ku isi.” Leta y’Ubushinwa ntacyo iratangaza ku mugaragaro ku byavuzwe na Bwana Wray.

Mu ijambo ryamaze hafi isaha ejo ku wa kabiri, uyu mukuru wa FBI yavuze ko Ubushinwa bukora ubutasi bugera kure mu bukungu, amakuru, kwiba amafaranga n’ibikorwa bitemewe bya politiki, bukoresheje ruswa no gukangisha ngo bugire ijambo kuri politiki ya Amerika

Yagize ati: “Tugeze aho ubu buri masaha 10 FBI itangiza igikorwa cyo guhangana n’ubutasi bwerekeranye n’Ubushinwa. Mu bikorwa hafi 5,000 byo kurwanya ubutasi biri gukorwa ubu mu gihugu, hafi kimwe cya kabiri ni ibirebana n’Ubushinwa”.

Bwana Wray, yavuze ko Perezida w’Ubushinwa Xi Jinping yayoboye porogaramu yitwa “Fox Hunt“, yo guhangana n’Abashinwa baba mu mahanga babonwa nk’ababangamiye leta y’Ubushinwa. Ati: “Turavuga abatavuga rumwe n’ubutegetsi, abahunze, n’abanenga leta bashaka kwerekana ihonyangwa ry’uburenganzira bwa muntu rikabije. Leta igashaka kubahatira kugaruka mu Bushinwa, inzira bakoresha mu kubigeraho ziteye ubwoba.”

Bwana Wray, akomeza avuga ko niba hari nk’umushinwa uri muri Amerika bashaka, bohereza intumwa kumusura imuzaniye ubutumwa bwo guhitamo “kugaruka ako kanya mu Bushinwa cyangwa kwiyahura.”

Muri iri jambo ridasanzwe, Bwana Wray yasabye Abashinwa bavukiye mu Bushinwa baba muri Amerika kugera kuri FBI niba abategetsi b’Ubushinwa bababwiye ko bashaka ko bataha.

Mu bihe byashize, leta y’Ubushinwa yavuze ko iyi gahunda ari igikorwa kigamije kurwanya ruswa. Bwana Wray yavuze ko inkeke Ubushinwa buteje Amerika zizagarukwaho n’ushinzwe ubutabera muri Amerika mu byumweru biri imbere. Yavuze ibi mu gihe ubushyamirane bukomeje kwiyongera hagati y’Ubushinwa na Amerika.

Perezida Donald Trump wa Amerika amaze igihe anenga bikomeye Ubushinwa muri iki gihe cya Covid-19, abushinja ko aribwo nyirabayazana w’iki cyorezo cyugarije Isi.

Ubushinwa burahatanira kuyobora isi

Uko umunyamakuru wa BBC dukesha iyi nkuru abibona

Zhaoyin Feng, umunyamakuru wa BBC ishami ry’Igishinwa ukorera i Washington, avuga ko atari ubwa mbere uyu mukuru wa FBI anenze Ubushinwa, ariko ko ejo ku wa kabiri yagiye kure akibasira politiki z’iki gihugu.

Avuga ko ari ikimenyetso kirashe ko Washington ubu itabona Beijing nk’umukeba ushotorana gusa, ahubwo nk’umukeba unashaka kuyobora isi. Avuga ko ubutegetsi bwa Trump buvuga ko iki ari igihe cyo guhaguruka bakava muri politiki yo kubana n’Ubushinwa yananiranye mu myaka 40 ishize.

Gusa ku rundi ruhande hari ababona ko ibi ari uburyo bwa Perezida Trump bwo kuyobya uburari ngo abantu bahugire kuri ibi, ntibite ku byamunaniye kuri manda ye irangiye, maze yongere amahirwe yo gutsinda amatora ari imbere.

Uyu munyamakuru, avuga ko ikiboneka neza ari uko amakimbirane y’Ubushinwa na Amerika yafashe indi ntera, ko uzatorwa wese mu matora, bitazabuza ko ubu bushyamirane bukomeza.
Munyaneza Theogene / intyoza.com