Leta ya Afurika y’epfo yatangaje amabwiriza mashya, arimo kongera kubuza ubucuruzi bw’inzoga, mu rwego rwo kwirinda ikwirakira rya coronavirus. Perezida Ramaphosa yavuze ko kubuza gucuruza inzoga ku nshuro ya kabiri muri uyu mwaka bizagabanyiriza akazi urwego rw’ubuzima. Hashyizweho umukwabu wa nijoro, ndetse kwambara agapfukamunwa umuntu asohotse hanze bigirwa itegeko.  

Izi ngamba zifashwe mu gihe abanduye Coronavirus muri iki gihugu bamaze kugera kuri kimwe cya kane cya miliyoni. Abamaze kwicwa n’iki cyorezo bamaze kurenga 4,000 kandi Leta iteganya ko iyi mibare ishobora kuzamuka ikagera ku 50,000 kugeza mu mpera z’uyu mwaka. Iki gihugu nicyo kizahajwe cyane n’iki cyorezo kurusha ibindi kuri uyu mugabane wa Afurika.

Mu ijambo ku batuye iki gihugu, Perezida Ramaphosa yavuze ko “abantu benshi bafashe ingamba zo kwirinda ko iyi virus ikwirakwira“, gusa ko hari n’abandi “badafite icyo bitayeho mu kwirinda no kurinda abandi“.

Yagize ati: “Hari abantu bamwe bihaye gukora ibirori, n’ibikundi byo kunywa, abandi bakagenda mu kivunge cy’abantu batambaye udupfukamunwa”.

Perezida Ramaphosa, avuga ko izi ngamba zigamije gukiza iki gihugu umuraba wa coronavirus, ibihe bidasanzwe bishobora gukomeza kugeza tariki 15 z’ukwezi kwa munani, uyu mwaka wa 2020.

Leta ivuga ko yateganyije ibitanda 28,000 by’abarwaye Covid-19 gusa. Ariko Perezida Ramaphosa yavuze ko igihugu kigikeneye abavuzi nibura 12,000 harimo abaganga, abaforomokazi n’abahanga mu igororangingo.

Kongera kubuza ubu bucuruzi bw’inzoga, BBC dukesha iyi nkuru itangaza ko bigamije kugabanya imirwano y’abasinzi, urugomo mu ngo n’agakungu k’abanywi ka buri weekend muri iki gihugu.

Abaganga na polisi bavuga ko ubwo gucuruza inzoga byari byarabujijwe mu mezi atatu mu gihe gishize, byagabanyije cyane abazanwa mu bitaro ikubagahu. Gusa na none abenga inzoga n’imivinyo kimwe n’ababicuruza, bo bashinjaga Leta ko ishaka guhagarika ubushabitsi bwabo.

Munyaneza Theogene / intyoza.com