Ishami ry’umuryango w’Abibumbye ryita ku buzima OMS/WHO, ryatangaje ko ritewe impungenge n’uburyo icyorezo cya Ebola kirimo kwiyongera muri Equateur(DRC). Hamaze kugarara abantu 56 bacyanduye kuva tariki ya 1 Kamena 2020 hatangazwa ko cyongeye kugaragara muri Repubulika iharanira Demokarasi ya Congo.

Matshidiso Moeti Umuyobozi wa OMS muri aka karere ka Afurika, avuga ko bafite isomo bakuye mu cyorezo giheruka mu mwaka wa 2018 muri aka gace. Avuga kandi ko bamwe mu banduye iki cyorezo bari mu duce twa kure ku buryo bigoye kubageraho.

Muri aka gace nkuko Radio Okapi ibitangaza, imibare y’abamaze kubarurwa ko banduye iki cyorezo imaze kurenga iyari yabaruwe mu mwaka wa 2018 ubwo iki cyorezo cyahagaragaraga, hakabarurwa 54 bacyanduye.

Muri aba bantu 56 bamaze gupimwa bikagaragara ko banduye iki cyorezo, 53 muri bo byaremejwe ko bakirwaye mu gihe abandi batatu bitaremezwa neza. Mu byumweru bitatu gusa bishize, abantu 28 byaremejwe ko bakirwaye.

OMS/WHO itangaza ko ubushobozi mu guhangana n’iki cyorezo budahagije. Ivuga kandi ko kuba iki cyorezo kije mu gihe Coronavirus nayo itoroheye iki gihugu ngo ntabwo birabuza ko ingamba zikwiye zifatwa mu guhangana n’iki cyorezo.

Mu kwezi kwa gatandatu uyu mwaka wa 2020, abashinzwe iby’ubuzima batangaje ko icyorezo cya Ebola cya mbere gikomeye cyashize, mu ntara eshatu zo mu majyaruguru ashyira uburasirazuba, ko kandi cyahitanye abantu bagera kuri 3.200.

Icyorezo cya Ebola cyatangajwe bwa mbere muri Congo kuwa 01 Kanama 2018, mu gihe abantu 3463 bagiketsweho, muri bo 3317 byemejwe ko bakirwaye, naho 2277 kirabahitana nkuko Minisiteri y’Ubuzima y’iki gihugu yabitangaje. Mu kwezi kwa Gatandatu gushize, iki gihugu cyatangaje ko mu burasirazuba bwacyo nta cyorezo cya Ebola ki kiharangwa.

Munyaneza Theogene / intyoza.com