Abategetsi b’umuryango mpuzamahanga ONU, batangaje ko abantu barenga 60 bishwe abandi 60 bagakomereka mu bwicanyi bakorewe muri Sudani, mu ntara ya Darfur.

Ishami rya ONU rishinzwe imfashanyo, OCHA, ryavuze ko abantu bitwaje imbunda bangana hafi 500 bateye mu mujyi wa Masteri, muri Sudani kuri uyu wa Gatandatu tariki 25 nyakanga 2020.

ONU ivuga ko abagabye iki gitero bateye mu giturage kirimo abo mu bwoko bw’aba Masalit, basahura abanyagihugu ndetse batwika inzu hamwe n’isoko ry’aho.

Nyuma y’icyo gitero, abanyagihugu barenga 500 bo muri ako gace, bahise bakora imyigaragambyo basaba ko ubutegetsi bubarinda. Abo bamasalit bavuze ko batazahamba ababo kugeza Leta igize icyo ikora.

Minisitiri w’intebe wa Sudani, nkuko ijwi rya Amerika ribitangaza yavuze kuri iki cyumweru ko igihugu cye kigiye kohereza ingabo zishinzwe umutekano mu ntara ya Darfur kurinda aba banyagihugu.

Munyaneza Theogene / intyoza.com