Perezida Emmerson Mnangagwa uyoboye iki gihugu cya Zimbabwe, niwe watangaje urupfu rwa Perrance Shiri wari Minisitiri w’ubuhinzi, aho yahitanwe n’icyorezo cya Covid-19 kuri uyu wa 29 Nyakanga 2020.

Ikinyamakuru cyigenga cyo muri Zimbabwe cyatangaje kuwa gatatu ko Shiri yari yashyizwe mu cyumba cya wenyine mu bitaro byigenga nyuma yo kwanduzwa iki cyorezo n’umushoferi we wapfuye mu mpera z’icyumweru gishize.

Shiri, yari umujenerali w’imyaka 65 utari ukiri mu kazi k’igisirikare, yigeze kuba ayoboye ingabo zashinjwe ubwicanyi bwahitanye abantu hafi ibihumbi 20 mu 1980. Ari kandi mu bagize uruhare rukomeye mu gukura ku butegetsi Perezida Robert Mugabe.

Shiri, nkuko ijwi rya amerika ribitangaza, abaye umutegetsi wa mbere ukomeye wishwe na COVID-19 muri Zimbabwe. Iki cyorezo kirimo kwiyongera cyane mu gihugu aho abarenga 2 700 bamaze kuwandura, naho 41 umaze kubahitana.

Munyaneza Theogene / intyoza.com