Ishyirahamwe mpuzamahanga ryita ku buzima OMS/WHO, ryatangaje kuri uyu wa gatatu ko ryiteguye gukorana n’Igihugu cy’Uburusiya mu gukurikirana ibikorwa by’igeragezwa ry’urukingo rw’icyorezo cya Coronavirus iki gihugu giherutse gutangaza ko cyavumbuye.

Perezida Vladimir Putin yavuze ku musi wa kabiri, hari tariki 11 Kanama 2020 ko Uburusiya aricyo gihugu cya mbere cyemeje ko cyarangije gukora urwo rukingo naho igice cya nyuma cy’igeragezwa ryarwo ku bantu 2000 cyagombaga gutangira ku munsi wakurikiraga ijambo rye, hari kuwa Gatatu tariki 12 Kanama 2020.

OMS/WHO, ivuga ko inkingo 28 ku zirenga 150 zirimo kugeragezwa ku bantu, ko zitandatu muri zo zigeze ko rugero rwa gatatu, mu kugeragezwa ku bantu benshi.

Urukingo rw’Uburusiya, nkuko ijwi rya amerika ribitangaza, rwakozwe n’ikigo cy’ubushakashatsi, Gamaleya gifatanije na Minisiteri y’ingabo. Ruriya rukingo ruri muri ziriya 28 zatangiye kugeragezwa ku bantu.

Munyaneza Theogene / intyoza.com