Kim Jong-un, umutegetsi mukuru wa Koreya ya ruguru, yaburiye abategetsi b’iki gihugu, abasaba kwitegura ibyago biturutse ku cyorezo cya coronavirus n’umuyaga ukaze witwa “Bavi”ushobora kwibasira iki gihugu muri iki cyumweru.

Perezida Kim yagaragaye ayoboye iyo nama, nyuma yuko hari hashize igihe hahwihwiswa ko ubuzima bwe bwaba butameze neza. Koreya ya ruguru ntabwo iremeza umuntu n’umwe urwaye Covid-19 kandi byibazwa ko iki cyorezo cyashegesha iki gihugu gicyennye mu gihe cyaba kihageze.

Ejo ku wa kabiri, avugira mu nama ya biro politike y’ishyaka riri ku butegetsi, Perezida Kim, watumuraga itabi ry’isigareti, yavuze ko hari “bimwe bitagenda neza” mu ngamba zo kugumisha hanze y’iki gihugu iyi “virusi mbi“, nkuko byatangajwe n’igitangazamakuru cya Leta.

Nta yandi makuru arenzeho icyo gitangazamakuru cya leta cyatangaje. Hashize igihe Koreya ya ruguru ikomeza gushimangira ko nta banduye coronavirus barangwa muri iki gihugu, nubwo bamwe mu bakurikiranira hafi iby’iki gihugu batabishira amakenga.

Nta muntu n’umwe Koreya ya ruguru iremeza ko yanduye coronavirus, ariko ubu hashize ibyumweru byinshi igitangazamakuru cya leta kidasubiramo iyo ntero. Nyuma yuko mu kwezi gushize hari uwacyetswe ko yaba yarayanduye, umujyi wa Kaesong wo ku mupaka hafi ya Koreya y’epfo wari washyizwe muri gahunda ya ‘guma mu rugo’, ariko ntabwo byigeze na rimwe byemezwa n’abategetsi ko uwo muntu yayanduye.

Kwigaragaza kwa Kim Jong-un kubaye mu gihe hahwihwiswaga byinshi ku buzima bwe, bamwe bavuga ko yanahaye ububasha bumwe mushiki we Kim Yo-jong. Uko guhwihwisa ku buzima bw’uyu mutegetsi mukuru wa Koreya ya ruguru nkuko BBC ibitangaza si ibintu bishya, ariko kugeza ubu byamye nta kuri kwabyo.

Munyaneza Theogene / intyoza.com