Urukiko rusesa imanza mu Bufaransa kuri uyu wa 02 Nzeri 2020 rwavuze ko tariki 30 z’uku kwezi kwa cyenda ari bwo ruzatangaza icyemezo cyarwo ku koherereza Félicien Kabuga ubucamanza mpuzamahanga nk’uko bivugwa n’ibiro ntaramakuru AFP.

Mu kwezi kwa gatandatu, urukiko rw’ubujurire rw’i Paris rwategetse ko Bwana Kabuga yohererezwa urwego rwasigaye rurangiza imirimo yasizwe n’urukiko mpuzamahanga rwa Arusha. Uruhande rwa Bwana Kabuga rwahise ruregera uyu mwanzuro mu rukiko rusesa imanza.

Urwo rukiko rwa nyuma mu nzego zica imanza mu Bufaransa, rusuzuma niba harakurikijwe amategeko mu guca imanza mu nkiko zaregewe mbere. Bwana Kabuga w’imyaka 87 yafatiwe i Paris mu kwezi kwa gatanu nyuma y’imyaka irenga 20 ashakishwa n’ubutabera.

Mu rukiko rw’ubujurire mu kwezi kwa gatandatu, Bwana Kabuga yavuze ko ibyaha ashinjwa ari “ibinyoma”.

Uyu munsi ku wa gatatu, uwunganira Bwana Kabuga yavuze ko umukiriya we arwaye diyabete, umuvuduko w’amaraso n’indwara ifata ubwonko yitwa leucoaraïose nk’uko AFP ibivuga.

Uyu mwunganizi nkuko BBC ibitangaza, avuga ko iyi ndwara imutera gutakaza ubushobozi bw’umubiri we n’ubwenge, bityo adakwiye “koherezwa ameze atyo muri kilometero 7,000” i Arusha muri Tanzania.

Munyaneza Theogene / intyoza.com