Amashyirahamwe afasha impunzi muri Uganda arinuba, nyuma y’aho Leta ihagarikiye arenga 200 muri yo, bitatu bya kane byayo, bizizwa gukora mu buryo bunyuranije n’amategeko y’iki gihugu ndetse no kutagira impapuro ziyemerera gukora.

Bamwe mu baharanira uburenganzira bwa muntu, bavuga ko iryo hagarikwa ry’ayo mashyirahamwe rizagira ingaruka mbi ku bantu Miliyoni imwe n’ibihumbi magana ane by’impunzi babarirwa muri iki gihugu cya Uganda.

Minisitiri wa Uganda ushinzwe impunzi no kurwanya ibiza, hagati mu kwezi kwa munani, yasohoye urutonde rw’amashyirahamwe 208 avuga ko akora mu buryo bunyuranije n’amategeko mu nkambi zo mu gihugu no mu bindi bice byashyizwemo impunzi.

Iyo baruwa y’uyu Minisitiri, ivuga ko ayo mashyirahamwe atagira impushya zo gukorera mu gihugu, mu gihe ayandi atasinye amasezerano ayemerera gukora. Ijwi rya amerika ritangaza ko amashyirahamwe amwe nka IRC na Action Aid yatangaje ko atari akwiriye gushyirwa kuri urwo rutonde kuko ngo akwije ibisabwa.

Intumwa idasanzwe ya ONU, Victor Ochen ashima iyo ngingo akavuga ko igiye gutuma ibintu bikorwa mu mucyo no kubahiriza amategeko. Avuga kandi ko bizagabanya ukutumvikana kwahoraga kugaragara hagati y’ayo mashyirahamwe.

Munyaneza Theogene / intyoza.com