Leta ya Kenya kuri uyu wa 15 Nzeri 2020 yongereye Tanzania ku rutonde rw’ibihugu abagenzi babivuyemo basonewe kudashyirwa mu kato k’itegeko k’iminsi 14 mu kwirinda ubwandu bwa coronavirus mu gihe bageze muri Kenya.

Iki cyemezo gifatwa nk’ikitavugwaho rumwe kuko Leta ya Tanzania imaze amezi atari make idatangaza amakuru ajyanye n’icyorezo cya Covid-19, ndetse mu kwezi kwa Gatandatu gushize Perezida Magufuri yatangaje ko iki gihugu kitakirangwamo iki cyorezo kubera amasengesho y’abaturage.

Kuri uyu wa gatatu, Tanzania nayo yahise ikuraho ingamba zo guhagarika kompanyi z’indege zo muri Kenya, ivuga ko kompanyi za Kenya Airways, Fly540 Limited, Safarilink Aviation na AirKenya Express Limited, guhera ubu zemerewe kongera kwerekeza muri Tanzania.

Mu itangazo yasohoye, Hamza Johari ukuriye ikigo cy’indege za gisivile muri Tanzania yavuze ko Kenya yamaze kubimenyeshwa. Yagize ati: “Tanzania izahora iteka yihatira gukurikiza amahame y’ingenzi yo mu masezerano y’i Chicago yo mu 1944 n’amasezerano y’ibikorwa byo gutwara abantu mu ndege hagati ya leta zombi”.

Ibi bihugu bituranyi byari bibanye nabi kuva mu kwezi kwa gatanu ubwo Kenya yabuzaga abashoferi b’imodoka z’amakamyo bavuye muri Tanzania kwinjira mu gihugu.

Leta ya Kenya yari imaze igihe ifite ubwoba ko Tanzania idakorera mu mucyo ku bijyanye no guhangana n’iki cyorezo.

Ibindi bihugu Kenya yasoneye ko abagenzi babivuyemo badashyirwa mu kato bageze muri Kenya nkuko BBC ibivuga, birimo nk’Afurika y’epfo, Leta Zunze Ubumwe z’Amerika, Ubuhinde, Mexique (Mexico) na Espagne.

Ibyo bihugu bisanzwe biri mu bifite umubare munini cyane w’abanduye n’abamaze kwicwa na Covid-19 ku isi. Ariko, abategetsi ba Kenya barakomeza gusaba abagenzi bose binjiye muri iki gihugu kwerekana icyemezo cyuko bapimwe Covid-19 bagasanga ntayo barwaye.

Abagenzi bafite igipimo cy’umuriro kiri hejuru ya dogere 37.5 C bazajya bashyirwa mu kato. Kugeza ubu muri Kenya abantu barenga 36,000 bamaze gutangazwa ko banduye coronavirus, muri bo abarenga 600 yarabishe, nkuko imibare ya Kaminuza ya Johns Hopkins ibigaragaza.

Munyaneza Theogene / intyoza.com