Polisi mu mujyi wa Dar es Salaam itangaza ko yataye muri yombi Musenyeri Emmaus Mwamakula wo mu itorero rya Morovian, imukurikiranyeho guhamagarira imyigaragambyo mu gihugu.

Nk’uko bitangazwa n’umukuru wa Polisi muri uyu mujyi, Lazaro Mambosasa, Musenyeri Mwamakula yahamagariye iyo myigaragambyo abinyujije ku mbuga nkoranyambaga nta burenganzira yabanje gusaba muri Polisi.

Musenyeri Emmaus Mwamakula azwi ko anenga bikomeye ubutegetsi bwa Perezida John Magufuli, ubu nabwo akaba yari yateguye imyigaragambyo yo gusaba itegeko nshinga rishyashya hamwe na Komisiyo nshya ishinzwe amatora.

Iyo myigaragambyo byari biteganijwe ko itangira uyu munsi ku wa kabiri tariki 16 z’ukwa kabiri 2021.

Mambosasa yabwiye abanyamakuru ati: “Twari tuzi ko uyu musenyeri wa Moravian asanzwe ayoboye imitima yari gushyikiriza ubutumwa biciye mu mategeko, ariko tumaze kubona ko Dr. Mwamakula arimo guhamagarira abantu kujya mu mihanda bamagana komisiyo ishinzwe gutegura amatora n’itegeko Nshinga kandi akomeza imyigaragambyo, byabaye ngombwa ko tumuhagarika”.

Mambosasa yavuze kandi ko uwo musenyeri yahagaritswe ku magambo yavuze kuko “yateye imidugararo mu banyagihugu biciye ku mbuga nkoranyambaga”.

Aciye ku mbuga nkoranyambaga asanzwe akoresha, Musenyeri Mwamakula amaze igihe ashishikariza abanyagihugu kumufata mu mugongo mu “rugendo rwe mu ntumbero yo gusaba ko hashingwa komisiyo nshyashya ishinzwe amatora hamwe n’itegeko nshinga rishyashya”.

Nk’uko uyu musenyeri abivuga, uru rugendo rw’amahoro rwagombaga gutangirira mu mujyi wa Dar es Salaam hanyuma rugakomeza kugera hagati mu gihugu.

Si bwo bwa mbere Musenyeri Emmaus Mwamakula yerekana aho ahagaze muri poritike. Mu matora aheruka yashyigikiye ku mugaragaro ishyaka ritavuga rumwe n’ubutegetsi, ACT Wazalendo.

Muri iki gihe, yari yatangaje ko yari agiye kumara imisi umunani azenguruka umujyi wose wa Dar es Salaam mu rugendo rwo gusaba ko hashingwa komisiyo nshyashya ishinzwe amatora hamwe n’itegeko nshinga rishyashya.

Hagati aho, yagiye guhagarikwa hasigaye amasaha make ngo iyi myigaragambyo yateguye itangire. Polisi itangaza ko ibyo yari yateguye binyuranije n’amategeko, yongera iburira buri wese wari kuyitabira.

Mu mwaka uheze, nkuko BBC ibitangaza, Tanzania yakoze amatora yabayemo ukutavuga rumwe, aho abatavuga rumwe n’ishyaka riri ku butegetsi bavuga ko yabayemo ubujura, ibyo Komisiyo ishinzwe gutegura amatora yamaganiye kure.

Munyaneza Theogene / intyoza.com