Mu rwego rwo kurwanya no guca inzoga z’inkorano zitemewe n’amategeko, Polisi y’u Rwanda ikorera mu Karere ka Kamonyi mu Murenge wa Runda ifatanije n’inzego zibanze n’abaturage batahuye urwengero rwa Top wine Ltd rwakoraga inzoga zitemewe n’amategeko. Hafashwe Litiro 1200 zari mubidomoro no mu makarito.

Ku bufatanye bwa Polisi, abaturage n’ubuyobozi bw’inzego zibanze kuri uyu wa Gatandatu tariki 8 Nzeli 2018 mu Kagari ka Ruyenzi, Umudugudu wa Kibaya hatahuwe urwengero rw’inzoga z’inkorano z’itemewe n’amategeko zikorwa na Top Wine Ltd ya Umuhoza Clementine. Hafatiwe Litiro 1200 zimwe zihita zimenerwa mu maso y’abaturage izindi zijyanwa kuri Polisi.

Itahurwa ry’uru rwengero, ryakozwe ndetse rishoboka biturutse ku makuru yatanzwe na bamwe mu baturage bamaze gucengerwa n’akamaro ko gukumira ibyaha, kurwanya ibiyobyabwenge no guca inzoga zikorwa mu buryo butemewe n’amategeko ari nazo zigira ingaruka ku buzima bw’abatari bake, baba abazikoresha ndetse n’abagerwaho n’ingaruka zitandukanye z’abazikoresheje mu miryango na banyirubwite.

Ubwo izi nzoga zafatwaga, uretse izari mu makarito zajyanywe kuri Sitasiyo ya Polisi ya Runda zitegerejwe kumenwa, izari mubidomoro zahise zimenerwa mu maso y’abaturage banahabwa ubutumwa bubakangurira kwirinda ikorwa, ikoreshwa n’icuruzwa ry’inzoga nk’izi. Basabwe kandi kuba abafatanyabikorwa beza mu gukumira ibyaha n’ikorwa ry’inzoga zitemewe batangira amakuru ku gihe yafasha kurandura ibikorwa nk’ibi.

Polisi yashimiye by’umwihariko abaturage bakomeje kugaragaza umusanzu wabo mu bufatanye nayo n’izindi nzego batanga amakuru, isaba ko ubu bufatanye bwakomeza bityo abakora ibinyuranije n’amategeko nti hagire umwanya bahabwa wo kwiyangiza no kwangiza umuryango nyarwanda.

Amakarito 40 arimo Litiro 480 z’izi nzoga z’inkorano zitemewe niyo yafatiriwe ajyanwa kuri sitasiyo ya Polisi ya Runda aho nayo agomba kumenwa. Nyiri ugufatanwa izi nzoga, havuzwe ko yaciwe amande 200,000Fr gusa agenwa n’inama njyanama y’Akarere.

Iki gikorwa cyo gufata izi nzoga z’inkorano zitemewe, kibaye nyuma y’amasaha make muri aka Karere habaye urugendo n’ibiganiro byagarutse ku kwigisha urubyiruko n’abaturage muri rusange guhagurukira gushimangira ubufatanye na Polisi n’izindi nzego hagamijwe kurandura ibiyobyabwenge, inzoga z’inkorano zitemewe hatangwa amakuru yatuma abakora bose ibitemewe n’amategeko batahurwa bagafatwa.

Intyoza.com