Igihugu cya Tanzania cyafunguye ikirere cyacyo ku ndege zitwara abagenzi. Ikigo cy’iki Gihugu gishinzwe iby’indege za gisiviri cyamaze gutangaza ko amabwiriza yabuzaga indege zitwara abagenzi kugwa muri iki Gihugu akuweho.

Ingendo z’indege zitwara abantu zarahagaritswe henshi ku isi, mu kwirinda ikwirakwira rya coronavirus. Iki kigo cya Tanzania cyatangaje kibinyujije kuri Twitter ko ibi bitewe no “kugabanuka kw’abandura Covid-19“.

Kuwa mbere w’iki cyumweru Tariki 18 Gicurasi 2020, Minisitiri w’ubuzima wa Tanzania yavuze ko abaje mu gihugu bazajya basuzumwa ibimenyetso bya Covid-19 aho binjiriye mbere yo gukomeza mu gihugu.

Mu minsi ishize, Perezida John Pombe Magufuli wa Tanzania yavuze ko igihugu kiri kwitwara neza mu kurwanya iki cyorezo, bivugwa ko ibi byatumye abaminisitiri batangira gusubiza ibintu uko byahoze.

Urwego rw’ubukerarugendo ni rwo rwa kabiri mu byinjiriza Tanzania amafaranga menshi nyuma y’ubuhinzi, rukaba rwarazahaye cyane kubera iki cyorezo.

Minisitiri ushinzwe ubukerarugendo, nkuko BBC dukesha iyi nkuru ibitangaza, yavuze ko igihugu kiri kongera kubufungura nyuma yo kumenya ko hari ibihugu byateguye ingendo zigana muri Tanzania.

Leta ya Tanzania ariko ishinjwa kudatanga amakuru buri munsi y’uko icyorezo cya coronavirus kifashe mu gihugu. Hari ingamba zimwe zafashwe zibuza amakoraniro y’abantu benshi.

Gusa Perezida Magufuli, yatsimbaraye ku cyemezo kivuga ko nta gufunga ibikorwa byose (lockdown) bigomba kubaho, kandi abajya mu nsengero bagomba gukomeza kujya gusenga.

intyoza.com