Mu Mudugudu wa Kigarama, Akagali ka Nyarurama, Umurenge wa Cyabakamyi ho mu karere ka Nyanza, kuri uyu wa 23 Gicurasi 2020, haravugwa abantu 26 bafashwe n’ubuyobozi basengera mu ishyamba rya Leta. Ni mu gihe amabwiriza ya Leta yo kwirinda icyorezo cya Covid-19 atemera ibikorwa nk’ibi.

Aba bantu uko uri 26 bari barimo basengera mu ishyamba rya Leta mu masaha ya Saa tanu z’amanywa, inzego z’ubuyobozi zibata muri yombi bitewe n’uko ibi biri mu bitemewe, kuko binyuranyije n’ingamba ndetse n’amabwiriza byashyizweho na Leta mu rwego rwo kurwanya Covid 19.

Ntazinda Elasme, Umuyobozi w’Akarere ka Nyanza mu kiganiro n’umunyamakuru wa intyoza.com yavuze ko aba baturage ibyo bakoze ari ukurenga ku mabwiriza n’ingamba Leta yashyizeho mu gukumira no kwirinda icyorezo cya Covid-19.

Ati” Abantu barenze ku mabwiriza basengera mu ishyamba turabimenya, turababuza, turabajyana kugirango tubigishe tubabuze, tubibutse amabwariza yo kwirinda Covid 19 kugirango batazakomeza kuyarengaho”.

Si ubwa mbere muri aka karere ka Nyanza humvikanye abantu batawe muri yombi bazira kurenga ku mabwariza yo kwirinda Coronavirus, aho abagiye bagaragara barimo n’abafashwe bariho basenga. Mu minsi yashize mu Murenge wa Busoro muri aka karere humvikanye abantu barindwi bariho basengera mu rugo rw’umuntu nabo batabwa muri yombi.

Meya Ntazinda, akomeza yibutsa abantu ko icyorezo cya Covid-19 kigihari, bityo abantu bakwiye gukomeza kubahiriza amabwariza nk’uko yashyizweho, bagategereza igihe gusengera mu nsengero bizasubizwaho, ko nta mpamvu yo kujya gusengera mu ishyamba kuko bitemewe. Abibutsa ko kurenga ku ngamba n’amabwiriza byashyizweho ari ugukomeza kwishora mu bishobora kubateza ibibazo

Amakuru agera ku intyoza.com avuga ko mu bantu 26 bariho basengera mu ishyamba, 11 ari abana bahise banarekurwa basubira mu miryango, naho abandi 15 bakuru bajyanywe kuri sitasiyo ya Police ya Mukingo kandi aba bantu nta dini rizwi ryabo. Ubuyobozi bukaba bukomeje gukora iperereza rigamije kumenya idini y’aba bantu.

Nshimiyimana Theogene/intyoza.com