Igihugu cya Tanzania cyaherukaga gutangaza amakuru y’imibare ku cyorezo cya Coronavirus tariki 29 Mata 2020. Kuri uyu wa mbere tariki 15 Kamena 2020, Minisitiri w’intebe w’iki gihugu, Kassim Majaliwa yavuze ko mu gihugu hari abantu 66 barwaye Covid-19.

Minisitiri w’Intebe Majaliwa, yavuze ko abo bantu 66 bari mu bitaro mu turere 10 tw’igihugu, yongeraho ko utundi turere 16 nta muntu ufite iki cyorezo uhari. Mu minshi ishize, Perezida John Magufuli yari yatangaje ko “nta coronavirus ikiri muri iki gihugu” kubera amasengesho y’abaturage.

Mu kwezi gushize kwa Gatanu, Ambasade ya Amerika yaburiye ko mu mujyi wa Dar es Salaam ibitaro byaho “byuzuriranye” kandi ko ibyago byo kwandura iki cyorezo muri uwo mujyi biri hejuru cyane, gusa ntiyatangaje ibyo ishingiraho yemeza ibi.

Mu ijambo rye ejo kuwa mbere, Minisitiri w’intebe yavuze ko imibare y’abanduye mu gihugu yagabanutse. Asaba abaturage gukomeza ingamba zatangajwe zo kwirinda gukwiza iyi virus.

Umubare w’abantu bose hamwe banduye coronavirus muri Tanzania ntabwo uzwi neza. Tariki 29 z’ukwezi kwa kane ubwo baheruka gutangaza imibare, Leta yavugaga abanduye bose ari 509 na 21 yishe.

Tariki 01 Kamena 2020, BBC dukesha iyi nkuru ivuga ko minisitiri w’ubuzima Madamu Ummy Mwalimu yavuze ko muri Dar Salaam hari abarwayi bane gusa.

Amashuri yisumbuye, amakuru na za kaminuza yongeye gufungura tariki 01 z’uku kwezi kwa Kamena, imikino nayo yongeye kwemererwa gutangira. Ni kenshi iki gihugu cyagiye kinengwa n’imwe mu miryango itandukanye mpuzamahanga gukerensa iby’iki cyorezo cya Covid-19.

Abategetsi ba Tanzania barimo Perezida Magufuri bagiye bavuga kenshi ko Imana yabakikijije iki cyorezo, ariko kandi banigeze gutumiza umuti wakozwe na Madagascar bivugwa ko uvura Covid-19 nubwo ntawe uzi uko wakoreshejwe n’abo bawuvuje..

Munyaneza Theogene / intyoza.com