Abantu bane bo mu muryango umwe w’abayisilamu bishwe “byagambiriwe” mu gitero cy’imodoka y’ikamyo kuri iki cyumweru tariki 6 Kamena 2021, nkuko polisi ya Canada ibivuga.

Icyo gitero cyabereye mu mujyi wa London wo muri Canada mu ntara ya Ontario. Umuhungu w’imyaka icyenda, umwe wenyine warokotse wo muri uwo muryango, ari mu bitaro aho ari kuvurirwa ibikomere bikomeye.

Umunya-Canada w’umugabo w’imyaka 20, yarezwe ibyaha bine by’ubwicanyi ndetse n’icyaha kimwe cyo kugerageza kwica.

Iki gitero ni cyo cya mbere gihitanye abayisilamu benshi muri Canada, nyuma y’icyabereye ku musigiti wo mu mujyi wa Québec mu mwaka wa 2017, cyiciwemo abantu batandatu.

Umupolisi mukuru Paul Waight yavugiye mu kiganiro n’abanyamakuru kuri uyu wa mbere ati:”Bifatwa ko aba bishwe bagambiriwe kubera ko ari abayisilamu”.

Yavuze ko polisi irimo kwiga ku kuba yarega ibyaha by’iterabwoba uwo mugabo ucyekwaho ubwicanyi, yongeraho ko bifatwa ko ari icyaha gishingiye ku rwango.

Ni iki kizwi ku bishwe?

Bari abagore babiri b’imyaka 74 na 44, ndetse n’umugabo w’imyaka 46 n’umukobwa w’imyaka 15. Ntabwo batangajwe amazina, nkuko abo mu muryango wabo babisabye.
Umuhungu w’imyaka icyenda ari mu bitaro aho arimo kuvurirwa ibikomere bikomeye ariko bitashyira mu kaga ubuzima bwe, nkuko polisi yabivuze.

Polisi yatangaje ko ucyekwa kugaba icyo gitero ari Nathaniel Veltman, w’imyaka 20, wo muri uwo mujyi wa London wo muri Canada. Yatawe muri yombi nta kibazo kibayeho mu gace k’ubucuruzi kari mu ntera ya kilometero hafi esheshatu uvuye ahabereye ubwo bwicanyi.

Ntabwo biramenyekana niba uwo ucyekwa hari imikoranire afitanye n’itsinda na rimwe rishingiye ku rwango, nkuko umupolisi mukuru Waight yabivuze.

Byakiriwe gute?

Minisitiri mukuru w’intara ya Ontario Doug Ford ni umwe mu bahaye icyubahiro abishwe, yandika kuri Twitter ati:”Urwango no kwanga abayisilamu NTA mwanya bifite muri Ontario”.

Minisitiri w’intebe wa Canada Justin Trudeau yanditse kuri Twitter ko “ababajwe bikomeye” n’amakuru y’iyicwa ryabo.

Yanditse ati: “Ku bakunzi b’abakorewe iterabwoba mu gikorwa cy’urwango cy’ejo [ku cyumweru], turi hano ku bwanyu”.

Ed Holder, umukuru w’umujyi wa London, yavuze ko icyo gitero ari “igikorwa cy’ubwicanyi bwo mu kivunge bwakorewe Abayisilamu, [bwakorewe] abatuye i London kandi bushingiye ku rwango ruteye ishozi”.

Mu itangazo yasohoye, ‘Mayor’ Holder yavuze ko aba avuga “mu izina ry’Abanye-London bose iyo mvuze ngo imitima yacu yashegeshwe. “Turababaye ku bw’uyu muryango…”

Itangazo rye ryongeyeho ko hashyizwe icyunamo cy’iminsi itatu. Inama nkuru y’abayisilamu muri Canada (NCCM) yasohoye itangazo ivuga ko umugabo ucyekwaho kugaba icyo gitero akwiye kuregwa ibyaha by’iterabwoba.

Mustafa Farooq, umukuru wa NCCM nkuko BBC ibitangaza, yagize ati: “Bivugwa ko umugabo yinjiye mu modoka ye, abona umuryango w’abayisilamu barimo bagenda bamanuka mu muhanda, afata icyemezo ko badakwiye kubaho”.

Itangazo yasohoye ryongeyeho riti: “Ntabwo yari abazi. Iki ni igitero cy’iterabwoba [cyakorewe] ku butaka bwa Canada, kandi gikwiye gufatwa gutyo”.

Mu kwezi kwa mbere mu 2017, Umunya-Canada w’umugabo yishe arashe abantu batandatu barimo basengera mu musigiti wo mu kigo ndangamuco cya kisilamu cy’i Québec, akomeretsa bikomeye abandi batanu. Uwagabye icyo gitero yakatiwe gufungwa burundu.

Mu mwaka wa 2018 ni bwo habaye igitero cya mbere cyo kugongesha imodoka cyiciwemo benshi muri Canada, ubwo umugabo yahuranyaga imodoka y’ivani mu itsinda ry’abagendaga ku maguru mu mujyi wa Toronto, yica abantu 10.

Munyaneza Theogene / intyoza.com