Minisitiri w’Uburinganire n’Iterambere ry’Umuryango, Uwimana Consolée, kuri uyu wa 10 Ugushyingo 2026 yatashye ku mugaragaro Ingoro y’Amahoro/Institute of Peace y’Umuryango SEVOTA washinzwe na Mukasarasi Godeliva(Mama mukuru). Ni inyubako iri imbere y’Ibiro by’Akarere ka Kamonyi. Yabwiye Abanyamuryango ba SEVOTA n’abitabiriye ibirori, ko iyi ngoro ikwiye kuba Igicumbi n’Umurage mwiza w’Amahoro, Icyizere, Ubumenyi n’Imbaraga bifasha kurema Umunyarwanda wifuzwa.

Minisitiri Uwimana Consolée, yashimiye Abanyamuryango ba SEVOTA by’umwiharimo Mukasarasi Godeliva washinze uyu mu ryango akaba azwi ku izina rya Mama Mukuru. Yabwiye abitabiriye ibirori, ati“ Twizeye ko iyi Ngoro y’Amahoro abazayigana bazahungukira Ubumenyi n’Ubushobozi bibafasha kwimakaza Urukundo, Ubumwe, Ubwubahane, Ubutabera, Ubufatanye no Guha agaciro Ikiremwa muntu byo shingiro y’Amahoro ku kiremwa muntu”.

Yashimiye Abafatanyabikorwa bagize uruhare mu gutuma uyu mushinga ugerwaho. Ati“ Uruhare rwanyu rugaragaza ko mwumvise neza ko kubaka Amahoro no guteza imbere imiryango bisaba ubufatanye bw’Inzego zose, zaba iza Leta, Imiryango itari iya Leta, Abikorera, Abafatanyabikorwa n’Abaturage muri rusange”.

Yasabye Abanyakamonyi n’abazakoresha iyi Ngoro bose kuyigira iyabo, kuyibyaza umusaruro ndetse no kugira uruhare mu bikorwa byayo kuko ngo agaciro kayo katazagaragarira gusa mu bwiza bw’Inyubako yatashywe, ahubwo mu mpinduka ku buzima bw’abazayigana ndetse n’Imiryango izafasha gukira ibikomere no gutera imbere.

Minisitiri Uwimana, yasabye kandi abayobozi mu nzego za Leta mu buryo butandukanye, gufasha kugira ngo ibikorwa by’iyi Ngoro y’Amahoro bijye bijyana n’ibyihutirwa nk’Ibikorwa bya Guverinoma, cyane cyane mu bijyanye no guteza imbere imibereho myiza y’Umuryango.

Yagize kandi ati“ Inyubako zubakwa n’Amabuye, Amatafari na Sima ariko Amahoro yubakwa n’Abantu. Ndasaba buri wese kugira uruhare mu kubaka no gusigasira Amahoro twifuza mu Gihugu cyacu. Iteka tujye tuzirikana ko Amahoro arambye atangirira iwacu mu ngo. Twese rero, duharanire kubaka Igihugu cy’Amahoro, Igihugu kitarangwamo Amacakubiri, Imiryango itarangwamo ihohotera rishingiye ku Gitsina, Inda ziterwa Abangavu, Ubusinzi, Ikoreshwa ry’Ibiyobyabwenge n’ibindi bibangamira imibereho myiza ya muntu”.

Mukasarasi Godeliva, Yabwiye intyoza.com ko iyi Ngoro y’Amahoro yitezweho kuzana impinduka nziza mu mibanire y’Umuryango, hagati y’Abagabo n’Abagore ndetse n’Abana babo mu rwego rwo gufatanya imirimo mu rugo, kunoza Uburezi n’Uburere, kuzana umwuka mwiza w’ibiganiro mu muryango biwubaka, bagahuza aho guhora mu makimbirane asenya Umuryango aho kuwubaka.

Agira kandi ati“ Dufite urutonde rw’Imiryango ibanye nabi, tuzahera kuri abo dutegure amahugurwa tubatumire baze tuganire kandi tubafashe kunoza ibitanozwa mu rugo. Tuzajya duhugura Umugabo n’Umugore, ba Nyirabukwe na ba Sebukwe ndetse n’Abana babo kugira ngo bubake wa muryango uteye imbere, Ushoboye kandi Utekanye”.

Mukasarasi, avuga ko bimwe mu bizakorerwa muri iyi Ngoro y’Amahoro birimo; Iby’Ubuzima bw’Imitekerereze, Ubujyanama mu myitwarire n’Imitekerereze, Kwigisha Imyuga y’Igihe gitoya, Guhuza Abantu mu rwego rwo gukiza no gukumira Amakimbirane, Igice kigaragaza amwe mu mateka n’Inzira Abagore ba SEVOTA banyuze, by’umwihariko ku bagiye gutanga Ubuhamya iy’Arusha. Icyumba cy’aho abantu biherera bagasenga Imana n’Ibindi. Hari kandi Ubusitani bw’Abanyakuri mu rwego Mpuzamahanga, aho abantu bazajya baza bicare bitekerezeho(Meditation).

Muhoracyeye Fortune, atuye mu Murenge wa Gatore ho mu Karere ka Kirehe. Yishimira Igikorwa cyo kubaka iyi Ngoro y’Amahoro cyakozwe na SEVOTA abereye umunyamuryango. Ashima cyane Mukasarasi Godeliva, afata nk’umubyeyi we nyuma y’uko Jenoside yakorewe Abatutsi mu 1994 imutwaye abe bose agasigara wenyine, ariko nyuma akaza guhura n’uyu mubyeyi wamubereye umubyeyi mu gihe yari yarihebye, yarabihiwe n’Ubuzima.

Ati“ Jenoside yabaye mfite imyaka 12, Ababyeyi barabica, abo tuvukana…, nsigara Njyenyine. Mu by’ukuri byari inzira ndende n’Igikomere! SEVOTA(Mukasarasi) rero yaje kunsanga, ansanga mu gahinda, mu mubabaro. Nari nubatse mfite ibibazo byo kubura Umuryango, byo kubura uwo mbwira, byo kubura aho njya, Umubyeyi SEVOTA rero araza, njye mwita Umubyeyi kuko nibwo nize kuvuga ‘Mama’, ubundi numvaga bitabaho ariko aje anyereka Urukundo”.

Akomeza, ati“ Icyambere yabanje kunkorera yarampembye kuko nari mfite Igikomere cyo kubyara si mpembwe. Yasanze mbyaye imbyaro ya 5, aza kumpemba ankorera ibyo umubyeyi akorera umwana we aje ku muhemba. Nibwo numvise noneho mbaye Umuntu, ntangira kujya aho abandi bari, ntangira kuvuga, Ntangira guseka, Ntangira Kwishima”. Ahamya ko yizera adashidikanya ko iyi Ngoro y’Amahoro izagira uruhare rukomeye mu kubaka no kuzana Amahoro mu Muryango.

Umuryango SEVOTA(Solidarite Pour l’Epanouissement des Veuves et des Orphelins Visant le Travail et Aides) kugeza ubu ukorera mu Turere 11 tw’u Rwanda. Ufasha cyane Abapfakazi ariko cyane Abagore bahuye n’Ihohoterwa rishingiye ku Gitsina mu gihe cya Jenoside yakorewe Abatutsi ndetse n’abana bavukiyemo. Ifasha kandi mu bijyanye no kubaka umuryango utekanye urangwa n’Amahoro.

SEVOTA, yagize uruhare rukomeye mu rukiko Mpuzamahanga mpanabyaha rwashyiriweho u Rwanda iy’Arusha rwaburanishaga abakekwagaho ibyaha bya Jenoside yakorewe Abatutsi, aho Ubuhamya bw’Abagore baturutse muri SEVOTA bwatumye Urukiko rwemeza ko Gufatwa ku Ngufu, Ihohotera rishingiye ku Gitsina, Gusambanya Abagore n’Abakobwa ku ngufu ari imwe mu ntwaro yakoreshejwe mu gihe cya Jenoside yakorewe Abatutsi mu 1994 mu Rwanda, bityo bwa mbere mu mateka, Urukiko rwanzura ko ibyo ari ibyaha byakorewe Inyoko muntu, biba bimwe mu byaha bikurikiranwa kandi bigahanwa ku rwego mpuzamahanga.

Munyaneza Theogene