Ku nshuro ya gatanu, ikipe y’igihugu ya Cameroon (Lions indomptables) itwaye igikombe cya Afurika CAN aho itsinze ikipe y’igihugu ya Misiri ibitego 2-1 ikegukana CAN 2017 yaberaga muri Gabon.

Vincent Aboubakar hamwe na Nicolas Nkoulou, abakinnyi b’ikipe y’igihugu ya Cameroon nibo bayitsindiye ibitego bibiri ku mukino wa nyuma bakinaga n’ikipe y’igihugu ya Misiri bityo biyihesha igikombe cya CAN 2017 cyakinirwaga mu gihugu cya Gabon.

Uyu mukino wabereye kuri Stade ya Libreville, igice cya mbere cy’iminota 45 ntabwo cyahiriye ikipe ya Cameroon, ndetse cyarangiye benshi bavuga ko ishobora kurangiza umukino itsinzwe kuko babonaga irushwa, cyarangiye ari igitego kimwe cya Misiri ku busa bwa Cameroon. Igitego cyabonetse ku munota wa 21 w’iki gice cya mbere gitsinzwe na Mohamed Elneny.

Ikipe ya Cameroon, yagarutse mu gice cya kabiri yakoze impinduka ndetse bigaragara ko ishaka intsinzi, yasatiraga bikomeye ishaka kwishyura ndetse iza kubigeraho ku munota wa 59 w’umukino ariwo wa 14 w’igice cya 2 igitego cyatsinzwe na Nicolas Nkoulou.

Iminota 90 isanzwe y’umukino ibura gusa iminota ibiri ngo igere, benshi bari batangiye gutekereza ko umukino urangira ari igitego kimwe kimwe maze amakipe yombi akajya mu minota y’inyongera, siko byagenze kuko kuri uyu munota wa 88 nibwo Vincent Aboubakar yaboneye ikipe ye ya Cameroon igitego cya kabiri ari nacyo cyayihesheje kwegukana CAN 2017 kikaba igikombe cya 5 cya Afurika itwaye mu mateka yayo kuko icyambere yagitwaye mu 1984, 1988, 2000, 2002 n’iki cya 2017 cya gatanu.

Kanda hano ujye ubona amakuru y’iwacu kandi isaha ku isaha kuri Facebook no kuri twitter

Munyaneza Theogene / intyoza.com