Minisitiri w’intebe wa Côte d’Ivoire, Hamed Bakayoko w’imyaka 56, kuri uyu wa Gatatu yapfiriye mu bitaro byo mu Budage aho yavurwaga Kanseri, nk’uko byatangajwe na perezida w’iki gihugu.

Mu kwezi kwa karindwi mu 2020 nibwo Bakayoko yagizwe Minisitiri w’intebe, nyuma y’urupfu rutunguranye rw’uwo yasimbuye Amadou Gon Coulibaly.

Perezida Alassane Ouattara yavuze ko Bakayoko yari “urugero ku bakiri bato n’umugabo w’intangarugero mu kwizerwa”.

Mu kwezi kwa kabiri, Bakayoko yajyanywe gusuzumwa mu Bufaransa, nyuma yoherezwa mu Budage kuko amagara ye yarimo amera nabi.

Uyu mugabo wahoze ari umushoramari mu itangazamakuru nyuma akaba umunyapolitiki, yakoze umurimo w’ubuhuza mu ntambara y’imbere muri Côte d’Ivoire yo kuva mu 2002.

Issiaka Sangare uvugira ishyaka ritavuga rumwe n’ubutegetsi Front Populaire Ivoirien (FPI), yabwiye ibiro ntaramakuru AFP ko Bakayoko yari “umuntu ukomeye muri politiki no kunga igihugu”. Uretse kuba yari Minisitiri w’intebe, Hamed Bakayoko yari na Minisitiri w’ingabo.

Nkuko BBC ibitangaza, Patrick Achi ni we wagizwe Minisitiri w’intebe w’agateganyo, mu gihe Téné Birahima Ouattara, murumuna wa perezida, yagizwe Minisitiri w’ingabo w’agateganyo.

Munyaneza Theogene / intyoza.com