Ishami ry’Umuryango w’Abibumbye ryita ku buzima (OMS/WHO) kuri uyu wa 19 Werurwe 2020, ryaburiye ibihugu bya Afurika kwitegura ibihe bibi cyane biri imbere kubera icyorezo cya Corona Virus gishobora gusanga nta bushobozi buhangije bwo kukirwanya.

Umugabane wa Afurika niwo wonyine kugeza ubu ugereranije n’ibindi bice by’Isi utarashegeshwa na coronavirus. Impuguke mu by’ubuvuzi zaburiye ibihugu byo kuri uyu mugabane ko inzego zayo z’ubuzima n’ubusanzwe, zisanzwe zifite imikorere icumbagira zishobora kwisanga zarengewe byihuse no kutagira ubushobozi mu kurwanya iki cyorezo.

Umubare w’Abantu bamaze guhitanwa na Corona Virus muri Afurika, nkuko bbc dukesha iyi nkuru ibivuga, ni 16 bamaze gupfa; aho batandatu bari mu Misiri, batandatu muri Algeria, babiri muri Maroc, umwe muri Sudan n’umwe muri Burkina Faso.

Nkuko bbc dukesha iyi nkuru ikomeza ibivuga, ngo ibiro ntaramakuru AFP bisubiramo amagambo ya Tedros Adhanom Ghebreyesus, umukuru wa OMS, yavuze agira ati: “Afurika ikwiye gukanguka…mu bindi bihugu, twabonye mu by’ukuri ukuntu iyi virusi ifata umuvuduko mwinshi nyuma y’igihe runaka iyo hari ikiyitije imbaraga”.

Ejo ku wa gatatu Tariki ya 18 Werurwe 2020, igihugu cya Burukina Faso cyatangaje umuntu wa mbere wo muri Afurika yo munsi y’ubutayu bwa Sahara wishwe na coronavirus. Ni umugore w’imyaka 62 wari usanzwe anarwaye indwara y’igisukari (diabète).

Abategetsi bavuga ko uwo murwayi yishe ari Rose Marie Compaoré, wari visi-perezida w’inteko ishingamategeko muri icyo gihugu.

Muri Afurika y’Epfo, naho ejo ku wa gatatu abantu bayanduye bariyongereye bikomeye bagera ku 116, benshi muri bo bakaba ari abantu bari baragiye i Burayi. Uwo mubare urimo abarwayi 14 bavuye ku kuyanduzanya hagati mu gihugu.

Muri aka karere, kugeza kuri uyu wa Kane tariki 19 Werurwe 2020, mu Rwanda hari abantu 11 basanzemo iyi ndwara, Tanzania ni batanu, Kenya barindwi, DR Congo 14 naho mu Burundi na Uganda iyi ndwara nta muntu biratangazwa ko ayirwaye.

Munyaneza Theogene / intyoza.com