Perezida John Pombe Magufuri, kuri uyu wa 03 Gicurasi 2020 yatangaje ko agiye kohereza indege mu gihugu cya Madagasikari kuzana umuti wo mu byatsi wavumbuwe n’iki gihugu, aho Perezida wacyo yatangaje kumugaragaro ko urinda kandi ukanavura iki cyorezo.

Abategetsi b’iki Gihugu cya Tanzania bakomeje kunengwa imyitwarire yabo kuri iki cyorezo cyugarije Isi nabo ubwabo kitabasize. Aba bategetsi banengwa ku kuba batarigeze bafata ingamba zikomeye zo kukirinda no gukangurira abaturage muri rusange uburyo bwo kugikumira, ahubwo bakagaragara nk’abagisuzuguye.

Ibyo kwitegura kohereza indege yo kuzana umuti muri Madagasikari, Perezida magufuri yabivugiye mu muhango wo kurahiza minisitiri mushya w’ubucamanza n’itegekonshinga, nyuma yaho uwari kuri uwo mwanya Augustine Philip Mahiga apfuye bitunguranye ku wa gatanu.

Perezida Magufuli yavuze ko yamaze kubivuganaho na Leta ya Madagascar ndetse ko agiye kohereza indege kuri icyo kirwa ngo ijye gufatayo uwo muti.

Yagize ati: “Ndikuvugana na Madagascar ndetse bamaze kwandika ibaruwa bavuga ko hari umuti bavumbuye”.

“Tuzoherezayo indege ngo izane uwo muti kugira ngo n’Abanyatanzania na bo bashobore kubyungukiramo. Rero twe nka Leta, turi kubikoraho amanywa n’ijoro”.

Uyu muti gakondo wavumbuwe na Madagascar, nkuko BBC dukesha iyi nkuru ibivuga watangajwe ku mugaragaro na Perezida Andry Rajoelina wa Madagascar mu kwezi gushize kwa kane, ndetse ibihugu bimwe byo muri Afurika bimaze kuwutumiza bisaba ko wabigeraho.

Nubwo watangajwe ku mugaragaro na Perezida w’Iki Gihugu ndetse bimwe mu bihugu bya Afurika bikagaragaza ko byishimiye iki gikorwa, bikanatangira kuwutumiza, ishami ry’umuryango w’abibumbye ryita ku buzima (OMS/WHO) ntabwo ryigeze riha umugisha iby’uyu muti. Rivuga ko ko kugeza ubu nta muti nta n’urukingo Covid-19 – indwara y’ubuhumekero iterwa n’ubu bwoko bushywa bwa coronavirus – igira.

Perezida Magufuli yanabwiye abaturage ko Tanzania itazahajwe na Covid-19 nkuko ibitangazamakuru mpuzamahanga bimwe bibivuga, asaba abaturage gukomeza ubuzima bwabo bwa buri munsi nkuko bisanzwe.

Yasabye Minisitiri mushya Mwigulu Nchemba, gukorana bya hafi na minisiteri y’ubuzima bakamenya impamvu imbuto zimwe n’amatungo byasanzwemo Covid-19 ubwo byapimwaga muri ‘laboratoire’ y’igihugu.

Yanavuze ko abantu benshi babwiwe ko banduye Covid-19 kandi ntayo banduye – avuga ko bishoboka ko abahanga muri siyansi bamwe bari gukorana rwihishwa n’abo yise “bagashakabuhake”.

Kugeza ubu Tanzania imaze gutangaza abantu 480 bose hamwe bemejwe ko banduye coronavirus, 16 muri bo imaze kubica. Kugeza ubu, nicyo Gihugu gifite umubare uri hejuru kurusha ibindi muri aka karere.

intyoza.com