Barack Obama wavuye ku butegetsi agasimburwa na Donald Trump, kuri uyu wa 16 Gicurasi 2020 yongeye kunenga ubutegetsi bw’uyu wamusimbuye uburyo bukomeje kwitwara imbere y’icyorezo cya Covid-19 cyugarije Isi. Obama, yari aheruka kwibasira Trump avuga ko, uko Amerika irimo kwitwara ari akajagari karenze ukwemera.

Barack Obama, mu butumwa bwa videwo bwo kuri internet yagejeje ku banyeshuri bari barangije amasomo yabo ya kaminuza, yavuze ko iki cyorezo cyagaragaje ko abategetsi benshi “batanajijisha nibura ngo berekane ko ibintu bashoboye guhangana nabyo“.

Bubaye ubwa kabiri mu minsi micye ishize Bwana Obama yibasira uburyo ubutegetsi bwa Trump buri kwitwara mu kibazo cya coronavirus.

Mu cyumweru gishize, mu butumwa bwo mu nama yo kuri internet mu buryo bw’iyakure bwatangajwe imburagihe, yavuze ko uko Amerika iri kwitwara muri ibi bihe ari “akajagari karenze ukwemera”.

Iryo jambo ry’ejo ku wa gatandatu yarigejeje ku banyeshuri barangije kaminuza, bo mu mashuri makuru na kaminuza bibarirwa muri za mirongo bifite amateka yuko byakunze kwakira abanyeshuri b’abirabura.

Bwana Obama yavuze ko Covid-19, indwara y’ubuhumekero iterwa n’ubu bwoko bushya bwa coronavirus, yashyize ku karubanda ibitagenda mu butegetsi bw’iki gihugu.

Yagize ati: “Niba hari ikintu kimwe iki cyorezo cyakoze, kera kabaye cyaciye neza neza igitambaro cyapfukaga benshi cyane bari mu butegetsi bibwiraga ko bazi ibyo barimo gukora”.

Yongeyeho ati: “Benshi muri bo nta nubwo bajijisha ngo berekane ko bashoboye“.

Mu masaha 24 ashize, abantu barenga 1,200 bapfuye bazize Covid-19 muri Amerika, nkuko imibare mishya ya Kaminuza ya Johns Hopkins ibigaragaza.

Umubare w’abo imaze kwica bose hamwe muri Amerika baragera hafi ku 89,000 – uyu ukaba ari wo mubare uri hejuru cyane ku isi.

Barack Obama yanavuze ku ngaruka iki cyorezo kiri kugira ku birabura bo muri Amerika.

Ati: “Icyorezo nk’iki kinamurika neza ku busumbane buriho ndetse n’imitwaro y’inyongera abirabura bakomeje kugenda bahura nabyo mu mateka yo muri iki gihugu”.

Abanyamerika bafite inkomoko muri Afurika bagize umubare munini w’impfu zitewe na coronavirus ndetse n’abajyanwa mu bitaro muri Amerika.

Kuva Obama yava ku butegetsi mu mwaka wa 2017, ntiyakunze kongera kwigaragaza ndetse ni gacye cyane yavuze ku bikorwa by’uwa musimbuye.

Gusa we n’uwamusimbuye, nkuko BBC dukesha iyi nkuru ibitangaza ngo mu minsi micye ishize bagiye bumvikana baterana amagambo, bituma Donald Trump ashinja Obama n’abajyanama be kuba bari mu gikorwa cy’ubugizi bwa nabi cyo kubangamira ubutegetsi bwe.

Mu cyumweru gishize, Perezida Trump yanditse kuri Twitter ati: “Icyaha gikomeye cyane muri politike kibayeho mu mateka y’Amerika, kugeza ubu!”

intyoza.com