Abayobozi bashinzwe iby’Ubuzima mu Gihugu cya Kenya, basubije inyuma abanyamahanga bagerageje kwinjira ku mipaka itandukanya iki gihugu na Tanzania nyuma y’uko babapimye bakabasangana Coronavirus.

Muri abo banyamahanga basanze baranduye, 126 muribo ni abaciye ku mupaka munini wa Namanga. Abandi bapimiwe ku mipaka yindi ine. Ubwenegihugu bw’abo banyamahanga ntibwatangajwe.

Kuwa gatandatu w’icyumweru gishize, BBC dukesha iyi nkuru ivuga ko, Umukuru w’igihugu cya Kenya, Uhuru Kenyatta, yafunze imipaka igihugu cye gihana na Tanzania hamwe na Somalia kubera ukwiyongera kw’abanduye banyura ku mipaka.

Minisitiri w’Ubuzima muri Kenya, Mutahi Kagwe, kuwa kabiri tariki 19 Gicurasi 2020 yabwiye ibinyamakuru ati: “Ntidushobora kwemerera abantu bavuye hanze kwinjira muri Kenya badafite icyemezo cy’uko batarwaye Covid-19. Ni cyo kimwe n’uko tutarimo kwemerera abashoferi b’abanyakenya kuva mu gihugu badafite icyo cyemezo.

Akomeza ati “Icyari kuba iyo tudafata icyemezo cyo gupima abantu ku mupaka ni uko imibare y’abanduye mu gihugu yari guhita izamuka cyane”.

Abandi bantu 18 banduye coronavirus babasanze ku mupaka wa Kenya na Somalia mu karere k’uburasirazuba bwa Kenya. Cumi na bane muri bo bagerageje kwinjira baciye i Wajir mu gihe abandi babiri bashakaga guca Garissa.

intyoza.com