Imibare y’abantu bamenyekanye ko banduye Coronavirus muri Sudani y’Epfo kuri uyu wa 21 Gisurasi 2020 yikubye hafi kabiri igera ku bantu 481 mu ijoro ryakeye. Ni nyuma yuko mu masaha 24 ashize habonetse abantu 140 banduye. Mu bamaze kwandura harimo abategetsi 8 bo muri Guverinoma.

Amakuru aturuka mu Gihugu cya Sudani y’Epfo, avuga ko abagize guverinoma bagera ku munani (8) babasanzemo iki cyorezo. Kugeza ubu, batatu muri bo baratangajwe. Abo ni; Visi Perezida, Minisitiri w’Umutekano hamwe na Minisitiri w’Itangazamakuru.

Aba bose bari mu bagize itsinda ryihariye rya Guverinoma ryo kurwanya Covid-19, aho riyobowe na Perezida Salva Kiir wungirijwe na Visi Perezida Riek Machar.

Perezida Kiir, yabonanye n’iri tsinda mu mpera z’icyumweru gishize ariko nta kiratangazwa niba nawe yarapimwe n’uko ahagaze. Uyu munsi kuwa kane hateganyijwe inama y’abaminisitiri ariko ntamuntu uzi abari buyitabire.

Ejo kuwa 20 Gicurasi 2020, BBC dukesha iyi nkuru ivuga ko Bwana Salva Kiir yandikiye ibaruwa umwungirije, Bwana Machar amwifuriza gukira vuba we n’abandi bagize ririya tsinda banduye Covid-19.

Imirwano y’amoko

Hagati aho, abategetsi bavuga ko imirwano ya vuba hagati y’amoko muri Leta ya Jonglei yiciwemo abantu bagera kuri 300, ababarirwa mu bihumbi bavuye mu byabo barahunga.

Muri iyi mirwano ishyamiranyije amoko y’abahinzi n’aborozi hiciwemo abakozi batatu bo mu miryango ifasha, harimo umwe wa Médecins Sans Frontières. Imirwano yasubukuwe kuwa gatandatu w’icyumweru gishize hagati y’amoko y’abatunzwe n’ubuhinzi n’abatunzwe n’ubworozi.

Abategetsi bavuga ko abantu bagera kuri 800 bamaze gupfa kuva imirwano nk’iyi yakongera gutangira mu kwezi kwa kabiri. Amasezerano yo kurangiza intambara mu gihugu yari imaze imyaka itandatu, yasinywe mu kwezi kwa kabiri hagati ya Salva Kiir na Riek Machar, gusa amakimbirane y’amoko yakomeje kuba bya hato na hato.

Abantu ibihumbi amagana bari mu nkambi z’ubuhungiro mu gihugu cyabo, mu minsi ishize hari babiri mu mpunzi basanzemo Covid-19, bitera impungenge ko iki cyorezo gishobora gukwira mu mpunzi.

intyoza.com