Perezida Andry Rajoelina wa Madagascar, yatangaje kuri uyu wa 21 Gicurasi 2020 ko yagiranye ikiganiro na Dr Tedros Adhanom ukuriye ishami ry’umuryango w’abibumbye ryita ku buzima OMS/WHO. Avuga ko uyu yashimye umuhate w’Igihugu cya Madagascar mu kurwanya Covid-19.

Perezida Rajoelina, avuga ko Madagascar yavumbuye umuti gakondo uvura coronavirus bise “Covid-Organic”, kugeza ubu ibihugu bimwe bya Afurika bikaba byaramaze kuwugezwaho.

Nubwo Madagascar yemeje uyu muti ko ukiza Covid-19, ndetse na bimwe mu bihugu byo ku mugabane wa Afurika bikaba byaramaze kugezwaho uyu muti, OMS yo ntabwo irawemeza. Nta n’undi muti uwo ariwo wose iremeza ko uvura iyi ndwara iterwa na virus nshya yo mu bwoko bwa coronavirus, ifata imyanya y’ubuhumekero.

Abinyujije kuri Twitter, Perezida Rajoelina yavuze ko OMS “izasinya ingingo zitazatangazwa ku bigize Covid-Organics kandi izashyigikira ibikorwa byo kureba niba uyu muti uvura muri Afurika”.

Mu nyandiko yari yabanje kwandika kuri twitter mu ijoro ry’ejo kuwa gatatu, Perezida Rajoelina yari yanditse ko Dr Tedros “yadushimye ku kuvumbura umuti wa Covid-Organics”, gusa iyo “tweet” yaje kuyisiba.

Abategetsi muri Madagascar, nkuko BBC dukesha iyi nkuru ibitangaza, bavuga ko ku bantu 131 bamaze gukira iyi ndwara benshi muri bo bayikijijwe n’uyu muti, muri iki gihugu abantu 371 barayanduye muri bo babiri yarabishe.

Ibihugu bimwe bya Afurika byatumije binatangaza ko umuti wa Madagascar wabigezeho, ibyo birimo; Tanzania, Niger, Tchad, Guinea Bussau, Guinea Equatorial, n’ibirwa bya Maurice.

Muri week end ishize, Perezida wa Nigeria Muhammadu Buhari yakiriye uyu muti ngo babanze bawugerageze. Ejo kuwa gatatu, Minisitiri wo muri Ghana yemeje ko guverinoma yatumije umuti wa Madagascar ngo bawugerageze.

Hashize iminsi OMS/WHO itangaje ko iri gukorana na Leta ya Madagascar mu gusuzuma niba uyu muti koko uvura Covid-19. Iri shami rya ONU ryaburiye Abanyafurika kwirinda gukoresha imiti itarasuzumwe ngo yemezwe n’abahanga mu kuvura iki cyorezo, kabone nubwo yaba ari iya gakondo.

Mu gihe OMS/WHO iburira abantu kudakoresha imiti itarapimwe ngo yemezwe n’abahanga, ngo kabone nubwo yaba ari imiti gakondo, Leta ya Madagascar yo yatangaje ko ntawe uzayihagarika mu gukoresha uyu muti kuri coronavirus no kuwuha abawukeneye.

intyoza.com