Nyuma y’uko Tariki 19 kamena 2020, abategetsi b’u Burundi batangarije itangazamakuru ko bagiye gutangira igikorwa cyo gupima icyorezo cya Covid-19 mu mavuriro yose y’uturere, kuri uyu wa 20 Kamena 2020 batangaje ko mu bipimo 531 byafashwe habonetsemo abantu 40 bashya banduye Covid-19. Leta itangaza ko igikorwa cyo gupima no gushaka abahuye n’abanduye gikomeza.

Imibare y’abantu bandura icyorezo cya Coronavirus mu Burundi irakomeza kwiyongera. Ibi bije nyuma y’aho kuri uyu wa Gatandatu tariki 20 Kamena 2020 Leta itangarije abandi bantu 40 basanzwemo iki cyorezo nyuma y’ibipimo byafashwe.

Mu itangazo ryaraye risohowe na Minisiteri y’Ubuzima muri iki gihugu, rivuga ko abo barwayi bashyashya bari mu bantu 531 bapimwe bose hamwe. Kugeza ubu mu Burundi, abamaze kwandura iki cyorezo bahise bagera ku bantu 144.

Minisiteri y’ubuzima, itangaza ko igikorwa cyo gushakisha abantu bamaranye umwanya munini n’abo barwayi bashyashya 40 gikomeza. Itangaza kandi ko 18 muri 28 bari basanzwe barimo kuvurwa icyo cyorezo, icumi muri bo bakize kandi bahawe uburenganzira bwo gusubira mu miryango yabo.

Hagati aho, nkuko BBC dukesha iyi nkuru ibitangaza, Minisiteri y’Ubuzima mu Burundi ntabwo itangaza umwidondoro w’abo bantu bashyashya ivuga ko basanzwemo iki cyorezo cya Covid-19.

Mu gihe ibihugu bitari bike byo mu karere byafashe ingamba zikomeye mu rwego rwo kugerageza guhagarika ikwirakwira ry’iki cyorezo, Leta y’u Burundi yo gushyika ubu, nta ngamba zikomeye irafata, ahubwo yagiye inengwa kenshi n’imiryango mpuzamahanga itandukanye ndetse n’abanyapolitiki bamwe kutitwararika kuri iki cyorezo.

Soma inkuru bijyanye hano: Mu buryo bweruye, Leta y’u Burundi yavuze ko igiye gutangira gupima Covid-19 hirya no hino mu gihugu

Icyorezo cya coronavirus cyatangiye kumenyekana mu mpera z’umwaka ushize wa 2019 mu mujyi wa Wuhan wo mu Bushinwa, ubu ni icyorezo gihangayikishije Isi yose. Ku wa 31 z’ukwezi kwa gatatu uyu mwaka wa 2020 nibwo Leta y’u Burundi yatangaje umuntu wa mbere wanduye iki cyorezo muri iki gihugu.

Munyaneza Theogene / intyoza.com