Perezida wa Madagascar Andry Rajoelina kuri iki cyumweru tariki 12 Nyakanga 2020, yavuze ko umusenateri umwe hamwe n’umudepite umwe bapfuye nyuma yo kwandura icyorezo cya Coronavirus. Yavuze kandi ko hari abandi badepite n’abasenateri 14 banduye iki cyorezo.

Madagascar, imaze gutangaza abaturage bayo barenga 2 500 bamaze kwandura iki cyorezo, barimo 35 cyahitanye. Leta yemeza ko abandura bazaba benshi mu mpera z’ukwezi kwa munani.

Leta ya Madagascar yari iherutse gusubiza igice kinini cyayo kirimo n’umurwa mukuru Antananarivo muri gahunda ya Guma mu rugo, hari tariki 05 Nyakanga 2020 nyuma yo kubona ko hari ubwiyongere bw’icyorezo cya Coronavirus. Iyi gahunda ya Guma mu rugo byatangajwe ko izageza tariki 20 Nyakanga 2020.

Madagascar yavuzwe cyane mu makuru mu kwezi kwa gatanu ubwo Perezida Andry Rajoelina yatangazaga ko babonye umuti ushobora kuvura no kurinda iki cyorezo.
Uyu “muti” muri Madagascar bise CovidOrganics ukoze mu byatsi byitwa Artemisia bisanzwe bikoreshwa mu kuvura malaria, watanzwe henshi mu mashuri mu gihugu ndetse hari na bimwe mu bihugu byo ku mugabane wa Afurika byawutumije.

Munyaneza Theogene / intyoza.com