Minisitiri w’ubuzima mu gihugu cya Madagascar yasabye imiryango n’amashyirahamwe akorana n’iki gihugu hamwe n’inzego zose zishinzwe ubuzima gufasha iki gihugu kurwanya icyorezo cya Covid-19 mu gihe imibare y’abanduye ikomeje kwiyongera. Iki gihugu nicyo Perezida wacyo aherutse gutangaza ko cyavumbuye umuti uvura Covid-19.

Urubuga rwa Actu Orange ruvuga ruti: ” Minisiteri y’Ubuzima yerekanye ko icyorezo cya Coronavirus mu byumweru bishize kiyongereye ku buryo buteye ubwoba muri iki gihugu cya Madagascar, aho imibare y’abanduye yagaragaye mu bice bimwe na bimwe cyane cyane mu murwa mukuru, Antananarivo”.

Abayobozi b’ibitaro bimwe na bimwe byo ku murwa mukuru wa Madagascar, bavuga batabaza ko bugarijwe nyuma y’imibare iherutse kuzamuma mu buryo buteye ubwoba, aho bavuga ko bazajya bakira gusa indembe za Covid-19.

Kugeza ubu iki kirwa cya Madagascar gifite abantu hafi 7500 banduye Covid-19 kandi ko hafi 80% muri bo basuzumwe mu kwezi gushize.

Perezida w’iki gihugu, Andry Rajoelina mu ntangiriro z’uku kwezi kwa Nyakanga 2020 yongeye gufunga umurwa mukuru nyuma y’aho imibare y’abanduye yiyongereye cyane.

Mu kwezi kwa kane, nkuko BBC ibitangaza, nibwo umukuru w’iki gihugu yatangaje ku mugaragaro “umuti wiswe covid-organics” wavuzwe ko uvura Covid-19, aho uyu muti wakwirakwijwe cyane mu gihugu, ndetse na bimwe mu bihugu byo kuri uyu mugabane wa Afurika bikawusaba ngo biwuhe abarwayi babyo.

Hagati aho, uwo muti gakondo wiswe covid-organis w’amazi wamaganiwe kure n’abahanga mu buzima mu gihugu cya Nijeriyandetse n’abo muri DRC, nyuma yo kuwukoraho ubushakashatsi ngo hemezwe niba koko ushobora kuvura Covid-19. Ishami ry’umuryango mpuzamahanga rishinzwe ubuzima-OMS/WHO naryo kuva uyu muti washyirwa ku karubanda na Perezida Rajoelina, ntabwo ryigeze riha uyu muti umugisha, ahubwo ryasabye abantu kwirinda kuwukoresha utaremezwa n’abahanga.
Munyaneza Theogene / intyoza.com