Umukuru w’Igihugu wa Amerika, Joe Biden yasabye imbabazi nyuma y’amafoto yafashwe ingabo z’Igihugu ziryamye muri parikingi. Izi ngabo zari zoherejwe gucunga umutekano ku nzu y’ikoranoro-Capitol. Ni amafoto yakwirakwijwe ku mbuga nkoranyambaga.

Ingabo zirenga ibihumbi 25 zoherejwe i Washington DC kugira ngo zicunge umutekano w’ibirori by’irahira rya Biden nyuma y’imyigaragambyo yadutse mu ntangiriro z’uku kwezi, hari tariki 6 Mutarama 2021.

Amafoto yafashwe izi ngabo agakwirakwizwa ku mbuga nkoranyambaga kuri uyu wa kane, aberekana baryamye muri parikini hafi y’iyo ngoro abashingamateka/abadepite n’abakenguzamateka/abasenateri bamaze kugaruka mu bikorwa byabo.

Ibinyamakuru muri Amerika bivuga ko ejo ku wa gatanu, Perezida Biden yahamagaye umukuru w’ibiro by’ingabo zishinzwe umutekano mu gihugu (National Guard) amusaba imbabazi yongera amubaza icyakorwa.

Umugore wa Perezida Biden, Jill Biden, na we ubwe yasuye zimwe muri izo ngabo kugirango azishimire ku giti cye, aho yanazishyiriye ibisuguti byoherejwe na Maison Blanche/White House nk’ishimwe.

Ati: “Nifuje kuza hano uyu musi kugirango mbashimire mwese kubona mwarandinze mukarinda n’umuryango wanjye”. Ku wa kane, amashusho yerekana amajana n’amajana y’izi ngabo ziryamye muri parikingi yarakwiragijwe cyane ku mbuga nkoranyambaga, ibyateye uburakari.

Abenshi berekanye impungenge ku mibereho y’izo ngabo, aho zashyizwe mu myotsi, batanahawe n’ibya ngombwa bikenewe nk’ubwiherero, nyuma y’iminsi myinshi bamaze barikanuye/badasinzira.

Aya mashusho yaberekanye bari mu buzima bubi yatumye kandi haba ubwoba ko ikiza cya coronavirus gishobora gukwiragira muri izo ngabo zishinzwe umutekano w’igihugu.

Ejo ku wa gatanu, umutegetsi utarashatse ko izina rye rimenyekana yabwiye ibiro ntaramakuru Reuters ko hagati y’100 na 200 muri izo ngabo zoherejwe muri icyo gikorwa zapimwe zigasanga zaranduye Covid-19. Iyi mibare, n’aho bishobora kuba ari mike cyane ku 25.000 by’izo ngabo zoherejwe muri icyo gikorwa, ntibiremezwa igihe.

Ayo mashusho yerekana izo ngabo ziryamye muma parikingi amaze gukwiragizwa, abashingamateka n’abakenguzamateka babinyujije ku mbuga nkorayambaga bagaragaje ukutabyishimira, ndetse bamwe muri bo bazitiza ibiro byabo kugira ngo  zishobore kuruhukiramo. Nyuma, bahavuye hafatwa ingingo ko zisubizwa kuri Capitol.

Ron DeSantis, buramatari/Meya wa Florida, ni umwe muri ba buramatari bavuga ko bategetse ko ingabo zavuye mu mareta yabo zitahukanwa inyuma y’iyo myidogo/kutishima.

Yabwiye ikinyamakuru Fox News ejo ku wa gatanu ati: “Iki ni igikorwa kitateguwe neza, rero icyaba cyiza ni ukubatahukana”.

Umukenguzamateka Roy Blunt yabwiye ikinyamakuru Politico ko itsinda rishinzwe amategeko mu nama nkenguzamateka na wo ubwawo urimo urakora amatohoza kuri iki kibazo.

Ejo ku wa gatanu, itangazo riteweko igikumu/risinyweho n’umukuru w’ingabo zishinzwe umutekano w’igihugu hamwe n’umukuru w’igipolisi gicunga umutekano w’ingoro y’amakoraniro ya Amerika Capitol, rivuga ko bakoranye kugira ngo abakorera kuri Capitol “bahabwe ibibanza bikwiriye” kugira ngo bashobore kuruhukiramo.

Bavuga kandi ko ingabo zaba ziri mu karuhuko zafatiwe ibyumba mu mahoteri cyangwa mu zindi nyubako, banashimira abashingamateka n’abakenguzamateka ku buryo bazitayeho.

Mu misi iza, nkuko BBC dukesha iyi nkuru ibitangaza, byitezwe ko abagera ku 19.000 muri izi ngabo bazasubizwa mu mareta baje bavamo, naho hafi 7000 bakaba bitezwe kuzaguma i Washington, nk’uko bivugwa n’ikinyamakuru New York Times.

Munyaneza Theogene / intyoza.com