Abategetsi muri Equateur bavuze ko imfungwa hafi 50 zo muri Gereza eshatu zapfuye, abandi batari bake barakomereka kuri uyu wa kabiri tariki 23 Gashyantare 2021, nyuma y’aho imitwe y’intagondwa y’abo bafungwa idacana uwaka yatanaga mu mitwe/yarwanaga.

Polisi mu gihugu cya Equateur, ibinyujije ku rubuga rwa Twitter yatangaje ko ubwo bwicanyi bwabereye mu Ntara za Guayas, Azuay na Cotopaxi.

Perezida wa Equateur, Lenin Moreno, yegetse ubwo bwicanyi ku cyo yise imitwe y’abicanyi ihora yatanye mu mitwe muri Gereza zitandukanye. Abategetsi bavuze ko barimo bakora kugira ngo bongere kugenzura izo Gereza.

Mu kwezi kwa cumi na kabiri k’umwaka ushize nkuko VOA ibitangaza, imigumuko/imvururu nk’iyo hagati y’iyo mitwe yahitanye ubuzima bw’imfungwa 11 hamwe n’abandi 7 bakomeretse. Ugutana mu mitwe hagati y’abafungwa kwahitanye 51 mu mwaka wa 2020, nkuko bivugwa na Polisi.

Equateur ifite imfungwa zigera ku 38 000, mu gihugu gifite miliyoni 17 z’abaturage.

Munyaneza Theogene / intyoza.com