Mu bizamini byanditse byakoreshejwe abahatanira kuba abanyamabanga nshingwabikorwa mu mirenge ibura abayobozi mu karere, haracyekwa itekenika aho bamwe mu bakoze ibizami ngo ntaho bagaragara mu basabye ako kazi.

Mu gihe bimenyerewe ko iyo imyanya y’akazi ishyizwe ku isoko mu bigo cyangwa ahantu hatandukanye hakenewe abakozi abayishaka bandika basaba ndetse bakuzuza ibisabwa, mu Karere ka Kamonyi haranugwanugwa itekenika mu kuba bamwe mu bakoze ibizamini byanditse byo kumwanya w’ubunyamabanga nshingwabikorwa w’umurenge batagaragara kuri Lisiti yasohowe n’akarere kubasabye ako kazi bikanavugwa ko hari bamwe baba batari bujuje ibisabwa byose.

Haba ku rutonde cyangwa Lisiti akarere kasohoye igaragaraho abantu 511( intyoza.com ifitiye kopi) haba ndetse n’urutonde rw’abantu 25 bajuriye narwo dufitiye kopi, nta nahamwe amwe mu mazina yakoze ibizamini byanditse ndetse akabitsinda agaragara.

Benshi mu baganiriye n’intyoza.com ariko batifuje ko amazina yabo atangazwa, bavuga ko bitumvikana uburyo umuntu ajya gukorana ikizamini n’abasabye uwo mwanya we atarabisabye. Bamwe bati keretse niba ari rya tekenika tujya twumva, ahari bikaba bishingiye ku kimenyane, Ruswa cyangwa ubucuti n’izindi mpamvu tutamenya zituma umuntu yemererwa gukora ikizamini kandi bigaragara ko kuri lisiti y’abasabye uwo mwanya atariho.

Bahizi Emmanuel, umunyamabanga nshingwabikorwa w’Akarere ka Kamonyi ku murongo wa terefone ngendanwa, yahakanye ko nta muntu wakora ibizamini ataratanze ibyangombwa, yagize ati:” Ubwose ibyo byashoboka, Oya ibyo ni ukwibeshya wenda bishobora kubaho, kuko bibaho ko wenda umuntu ashobora kuba yaratanze ibyangombwa ariko ntagaragare mu batoranijwe, bemerewe, icyo gihe rero iyo yanditse ajurira ubuyobozi bw’akarere bubyigaho bukareba niba ubujurire bwe bwaba bufite ishingiro.”

Bahizi, akomeza avuga ko icyo bareba ari ugukurikirana bakamenya niba koko batagaragara kuri izo ntonde, bakareba niba ibyo basabwaga barabitangiye ku gihe, niba barajuriye, akomeza ati:” birashoboka yuko abantu bashobora kuba baribeshye ku rutonde nurwo rw’abajurira ntibabandikeho bose, abantu babireba neza kuko ntabwo numva umuntu ko ashobora kwemererwa gukora ikizamini atarigeze atanga ibyangombwa.”

Imirenge ivugwa ko idafite abanyamabanga nshingwabikorwa ndetse hamwe hakaba hashize igihe kitari gito; ni umurenge wa Kayumbu, Karama, Kayenzi hamwe na Mugina. Hari kandi andi makuru agera ku kinyamakuru intyoza.com avuga ko hari na bamwe mu bayobozi b’imirenge bashobora guhindurirwa imyanga bakava ku kuyobora imirenge bakajyanwa mu karere kuyindi myanya bityo imirenge bayoboraga igahabwa bamwe mubazatsindira iyi myanya bamaze gukorera ikizamini kimwe cyo kwandika hakaba hasigaye icy’ibazwa (Interview).

Kanda hano ujye ubona amakuru y’iwacu kandi isaha ku isaha kuri Facebook no kuri twitter

Munyaneza Theogene intyoza.com