Abaturage bo mu Karere ka Kamonyi bavuga ko badasobanukiwe impamvu ubuyobozi bwahisemo kubaka umuhanda wa kaburimbo uhuza Ruyenzi, Gihara na Nkoto, mu gihe bo basanga umuhanda wa Rukoma ugera ku bitaro by’Akarere ari wo wari ukwiye guhabwa umwanya wa mbere. Bavuga ko umuhanda wa Rukoma ariwo ufite akamaro kanini kuko unyurwaho n’abagana ibitaro by’Akarere ka Kamonyi, aho abarwayi boherezwa n’ibigo nderabuzima bitandukanye, Abanyeshuri, Abacuruzi, Abajyana amabuye y’agaciro, ndetse n’abandi baturage bawukoresha mu buzima bwa buri munsi.

Ku ruhande rw’ubuyobozi bw’Akarere, buvuga ko umuhanda wa Ruyenzi-Gihara-Nkoto washyizwe imbere mu rwego rwo gutunganya no guteza imbere Umugi w’Akarere(Runda, Rugalika, Gacurabwenge), guteza imbere Ishoramari no kongera Imisoro.

Iyi ngingo yongeye kugaragaza ikibazo abaturage bakunze kugarukaho cyo Kugishwa inama mu itegurwa ry’Ingengo y’Imari ku bikorwaremezo bifuza, ariko nyuma y’uko ingengo y’imari yemejwe ntibagarukirwe ngo basobanurirwe ibyashyizwe imbere, ibyimuriwe ikindi gihe n’impamvu yabyo.

Bavuga ko umuhanda wa Rukoma ari wo wari ukwiye kubanza. Bavuga kandi ko batazi neza impamvu umuhanda wa Ruyenzi-Gihara-Nkoto ari wo watoranyijwe mbere, kuko kuri bo, umuhanda wa Rukoma ngo ufite ibikorwa byinshi by’ingenzi kandi ukoreshwa n’abantu benshi barimo; Abarwayi boherezwa n’ibigo nderabuzima byose by’imirenge 12 igize Akarere, bityo ko ngo bashobora guhuhurwa n’umuhanda mubi, baba berekezwa ku Bitaro cyangwa se bahakurwa boherezwa Kigali n’ahandi ku mavuriro yisumbuye.

Abimana Valérie, umuturage wo mu Murenge wa Rukoma, avuga ko atumva impamvu ubuyobozi bwahisemo umuhanda wa Ruyenzi-Gihara-Nkoto kandi ngo nta bikorwa byinshi byihariye bawubonaho ugereranyije n’umuhanda wa Rukoma.

Ati:“ Sinumva impamvu ubuyobozi bwahisemo kubaka umuhanda wa kaburimbo wa Ruyenzi-Gihara-Nkoto, kandi nta kidasanzwe uje gukemura, uretse kuba hatuwe n’abayobozi n’abakire. Nyamara umuhanda wa Rukoma ugera ahahoze ibiro by’Akarere ka Kamonyi, ndetse ukaba ari na wo unyurwaho n’abagana ibitaro by’Akarere”.

Akomeza avuga ko uyu muhanda unyuzwamo abarwayi boherezwa n’ibigo nderabuzima bitandukanye, nyamara ukaba utameze neza. Ati:“ Ni ho ibigo nderabuzima byose byohereza abarwayi. Abo barwayi banyuzwa mu muhanda mubi, urimo imikuku myinshi, ku buryo ushobora no kubabangamira kurushaho”.

Abimana, avuga ko umuhanda wa Rukoma wari ukwiye guhabwa kaburimbo mbere y’uwa Ruyenzi-Gihara-Nkoto kuko uhuza ibikorwa byinshi by’ingenzi birimo Ubwikorezi, Ubucuruzi bw’Amabuye y’Agaciro, Ibigo by’amashuri, Ikigo kigororerwamo abantu by’igihe gito, ndetse n’Ibikorwa by’umutekano kuko kuri uyu muhanda hari n’ikigo cya gisirikare.

Yongeraho ko abaturage badakwiye kugishwa inama gusa mu itegurwa ry’ingengo y’imari, ngo ibyifuzo byabo nibidashyirwa mu bikorwa ntibasobanurirwe impamvu. Ati:“ Mpora nibaza akamaro ko kugisha inama twe abaturage mu guhitamo ibikorwaremezo byajya mu ngengo y’imari y’Akarere, kandi ibyifuzo byacu bidashyirwa mu bikorwa, nti tunasobanurirwe impamvu”.

Ndagijimana Evariste, na we utuye mu Murenge wa Rukoma, avuga ko iyo abaturage basabwe gutanga ibyifuzo ku bikorwaremezo bakeneye, ariko ntibishyirwe mu bikorwa, ubuyobozi bwagombye kongera kubegera bukabasobanurira ibyahindutse. Ati:“ Byaba byiza tugiye tubwirwa ibyagendeweho mu guhitamo igikorwa iki n’iki. Icyo gihe natwe twumva ko bitureba, tukabona ko twahawe agaciro”.

Akarere kavuga ko kashyize imbere gutunganya umugi 

Ubuyobozi bw’Akarere ka Kamonyi buvuga ko butirengagiza ibyifuzo by’abaturage bitangwa mu nama zitandukanye zitegura ingengo y’imari n’igenamigambi ry’Akarere. Bugaragaza ko ubushobozi buhari budatuma byose bikorerwa icyarimwe.

Dr Nahayo Sylvère, Umuyobozi w’Akarere ka Kamonyi, avuga ko mu guhitamo ibikorwa bishyirwa mu ngengo y’imari harebwa ubushobozi buhari, icyihutirwa kurusha ibindi n’ingaruka igikorwa runaka kizagira ku iterambere ry’Akarere.

Ati:“ Ntabwo ibyifuzo byose by’abaturage ubushobozi buhari bwatuma tubigeraho icyarimwe. Ariko uko ubushobozi bugenda buboneka, dukora iby’ingenzi n’ibyihutirwa dushingiye ku mpamvu nyinshi zitandukanye, harimo n’uyu muhanda wa Ruyenzi-Gihara-Nkoto”.

Dr Nahayo avuga ko uyu muhanda washyizwe imbere kuko uri mu gice cy’umugi w’Akarere, bityo ukaba uri muri gahunda yo guteza imbere Imiturire, Ishoramari n’Ibikorwa byinjiriza Akarere.

Ati:“ Ni umuhanda ujya mu gice cy’umugi. Uri muri gahunda yo gutunganya umugi. Tugamije kuzamura imiturire no gukora ku buryo hinjira imisoro ituruka mu bikorwa bitandukanye”. Akomeza avuga ko guhitamo uyu muhanda byashingiye ku bushobozi bwari buhari n’uburemere bw’ahantu wagombaga kunyura.

Nyoni Lambert, Perezida w’Inama Njyanama y’Akarere ka Kamonyi ari nayo yemeza ikanatora Ingengo y’Imari, avuga ko ibitekerezo by’abaturage byakirwa mu itegurwa ry’ingengo y’imari, ariko ko bitashoboka ko byose bishyirwa mu bikorwa icyarimwe.

Ati:“ Kwakira ibitekerezo n’ibyifuzo by’abaturage mu itegurwa ry’ingengo y’imari birakorwa. Ariko si ko byose byashyirwa mu bikorwa, bitewe n’ubushobozi buba budahagije”.

Yongeraho ati:“ Abaturage bacu bifuza ibintu byinshi, ariko Igihugu kiba gifite byinshi kigomba gusaranganya. Ntabwo ibyifuzo byose byatanzwe byabonerwa ubushobozi. Harebwa ibyaherwaho kurusha ibindi, bitewe n’ibyihutirwa ndetse n’aho bishyirwa. Byose bikorwa mu nyungu rusange z’umuturage”.

Yaba Meya Dr Nahayo Sylvère ndetse na Perezida w’Inama Nyanama y’Akarere,  Nyoni Lambert, bavuga ko umuturage agomba kuba ku isonga mu bikorwa bimugirira akamaro, nk’uko n’icyerekezo cya Minisiteri y’Imari n’Igenamigambi, MINECOFIN, kibigaragaza.

MINECOFIN, igaragaza ko umuturage agomba kugira uruhare mu Itegurwa, Iyemezwa, n’Ishyirwa mu bikorwa ry’Ingengo y’Imari, aho agishwa inama ku bikorwa byihutirwa kugira ngo agire uruhare mu iterambere rye.

Gusobanurira abaturage ibyahindutse byongera icyizere

Masantura Emmanuel Ruziga, impuguke mu by’Ubukungu n’Imiyoborere uzwi cyane kuri Televiziyo y’u Rwanda, avuga ko ari ngombwa ko abaturage basobanurirwa ibyahindutse hagati y’ibyifuzo batanze n’ibyashyizwe mu ngengo y’imari.

Avuga ko iyo abaturage bagize uruhare mu gutanga ibitekerezo, ariko nyuma ntibasobanurirwe impamvu ibyifuzo byabo bitashyizwe mu bikorwa, bishobora kubaca intege no gutuma batumva neza uruhare rwabo mu iterambere.

Ati:“ Iyo abaturage batagishijwe inama n’abayobozi mu itegurwa ry’ingengo y’imari, haba harimo icyuho, kuko ikusanyabitekerezo ryabo rifasha no kumenya ibyihutirwa koko”.

Masantura, avuga ko iyo abaturage badafite amakuru ku bikorwa by’iterambere bibareba, bashobora kutabyibonamo, bityo ntibagire ishyaka rihagije ryo kubibungabunga.

Avuga ko ibiganiro hagati y’abaturage n’abayobozi bifasha abaturage kumenya impamvu ibikorwa bimwe bishyirwa imbere kurusha ibindi, kandi bikongera imyumvire y’uko ibyo bikorwa ari ibyabo.

Umuhanda wa Ruyenzi-Gihara-Nkoto watwaye Miliyari zisaga eshanu. Ni Umuhanda wubatswe mu byiciro bibiri, aho Igice cya mbere, gihera Ruyenzi kigana Gihara, gifite uburebure busaga kilometero eshanu. Cyatangiye kubakwa muri Gashyantare 2020, cyubakwa na JV GEMT & China Road Construction, gitwara amafaranga asaga Miliyari ebyiri z’amafaranga y’u Rwanda.

Igice cya kabiri, kiva Gihara kigana Nkoto, gifite uburebure bwa kilometero zirindwi. Gushyiramo kaburimbo byararangiye, hakaba hasigaye imirimo ya nyuma irimo; Gushyiraho ibyapa, Guca imirongo yo mu muhanda no kunoza ibitararangira. Iki gice cyagenewe amafaranga asaga Miliyari eshatu.

Kugeza ubwo iyi nkuru yakorwaga, umunyamakuru wa intyoza.com yari amaze ibyumweru bisaga bibiri ashaka amakuru arambuye ku mafaranga yose yakoreshejwe kuri uyu muhanda, Igihe watangiriye n’ibigo byawubatse, ariko inkuru igiye gusohoka atarayabona yose. Amakuru amwe yakoreshejwe ku ngengo y’Imari y’uyu muhanda, ibigo byawubatse n’igihe watangiriye, yifashishijwe akuwe mu nkuru zakozwe mu bihe byatambutse.

Nk’uko bigaragara mu igenamigambi ry’Akarere, imirenge ya Runda, Rugalika na Gacurabwenge ni yo igize umugi wa Kamonyi mu mirenge 12 igize Akarere. Ni na ho ibikorwaremezo byinshi byiganje, birimo n’uyu muhanda wa Ruyenzi-Gihara-Nkoto.

Abaturage bo mu yindi mirenge bavuga ko badahakana ko guteza imbere umugi ari ngombwa, ariko bagasaba ko n’ibindi bice by’Akarere bigira ibikorwa remezo bijyanye n’ibyo abaturage bakenera cyane mu buzima bwa buri munsi.

Bavuga ko nubwo basabwa gutanga ibitekerezo n’ibyifuzo mu itegurwa ry’ingengo y’imari, abayobozi bakwiye no kubagarukira iyo ingengo y’imari imaze gutorwa no kwemezwa, bakabasobanurira ibigiye gukorwa, ibitazakorwa n’impamvu yabyo.

Kuri bo, ibyo byatuma barushaho kwiyumva nk’abafatanyabikorwa nyabo mu iterambere ry’Akarere n’iry’Igihugu, aho kuba abantu batanga ibitekerezo ntibamenye uko byakiriwe n’impamvu ibyemezo runaka byafashwe.

Ubuziranenge bw’inzira z’amazi( Rigole) ku muhanda Gihara Nkoto, burakemangwa;

Munyaneza Théogène