Mu kwizihiza umunsi mukuru mpuzamahanga wa mwarimu wabaye kuri uyu wa mbere Tariki ya 5 Ukwakira 2026, Umuyobozi w’Akarere ka Kamonyi, Dr Nahayo Sylvere yasabye Abarimu kuba intangarugero mu kazi kabo, Gukunda umurimo no kurushaho kuwunoza, Kwihesha agaciro imbere y’abo barera, Guhanga udushya no gufasha abanyeshuri gukuza impano bifitemo kuko ari nyinshi.

Meya Dr Nahayo, avuga ko kwizihiza uyu munsi wa mwarimu biri mu rwego rwo kwereka mwarimu ko ari uw’agaciro ariko kandi ari no mu rwego rwo ku mushimira uruhare rwe mu burezi no guteza imbere Igihugu.

Agira kandi ati“ Mwarimu niwe mutima w’Uburezi, niwe utoza abana Ubumenyi, Indangagaciro n’Ubushobozi, kandi niwe ubategurira kuzaba abayobozi n’abaturage beza b’u Rwanda”.

Meya Dr Nahayo Sylvere, ashimangira ko mu kwizihiza uyu munsi ari n’uburyo bwiza bwo kumenyekanisha, kwerekana uruhare rwa mwarimu mu kubaka Ubukungu bushingiye ku bumenyi ndetse no mu kugera mu cyerekezo 2050 Igihugu cyihaye, ko kandi ku kijyanye n’Ireme ry’Uburezi ndetse n’Ikoranabuhanga, byose bigaragaza ko mwarimu ari inkingi ikomeye.

Avuga kandi ati“ Uyu munsi turawizihiza kandi kugira ngo tuzirikane ku byo mwarimu ahura nabyo, tumwumve, twumve ibyifuzo bye dufatanye mu gushaka ibisubizo byamufasha gukora neza akazi ke. Ni umwanya kandi wo kurengera no guteza imbere umwuga w’uburezi no gushimangira Ubufatanye hagati y’abarimu, Ubuyobozi ndetse n’abafatanyabikorwa mu kuzamura ireme ry’Uburezi”.

Akomeza avuga ko uyu ari n’umwanya wo guha Abarimu uburyo bwo kongera gutekereza, kwisuzuma no gutekereza uburyo hakosorwa ibitaragenze neza, binyuze mu gukomeza kwihugura guhoraho, kuko ngo mwarimu akwiye gukomeza kwihugura kugira ngo ubumenyi afite burusheho kujyana n’igihe ndetse n’icyerekezo cy’Isi by’umwihariko icyerekezo cy’Igihugu.

Meya Dr Nahayo, Asaba abarimu gukomeza mu cyerekezo cyiza barimo, Kwihesha agaciro mu bo barera ariko kandi no mu muryango Nyarwanda muri rusange. Ati “ Mukomeze rero kuba Intangarugero nk’uko n’ubundi mwari muri, mukunde Umurimo kandi mukomeze kurushaho kuwunoza. Muhange udushya kandi mufashe abanyeshuri gukuza impano bifitemo kuko abana turera bafite impano nyinshi, dukomeze kubafasha kugira ngo zikomeze kugenda zikura”.

Meya Dr Nahayo Sylvere, yasabye abayobozi batandukanye mu karere ka Kamonyi by’umwihariko abari mu burezi ndetse n’abafatanyabikorwa gukomeza gufatanya n’abarimu, kubegera no kubumva hagamijwe ko abafite ibibazo bishobora kubangamira akazi kabo ka buri munsi bafashwa ngo bishakirwe ibisubizo.

Umunsi mpuzamahanga wa mwarimu, washyizweho Tariki 5 Ukwakira 1966, wizihizwa buri mwaka hagamijwe gushimira no kuzirikana uruhare rukomeye mwarimu agira mu burezi ariko kandi n’uruhare rwe mu Iterambere ry’Igihugu. Ku rwego rw’Akarere ka Kamonyi, uyu munsi wizihirijwe mu murenge wa Rugalika, ahari abarimu basaga 500.

Insanganyamatsiko y’Umunsi mpuzamahanga wa mwarimu y’uyu mwaka wa 2026, igira iti“ Gushyigikira abarimu: Imyaka 60 yo kurengera umwuga w’Uburezi, Kuwuteza imbere no Gutegura ahazaza hacu”.

Théogène Munyaneza