Leta zunze ubumwe za Amerika zivuga ko zitazifatanya n’amahanga mu mugambi wo gukorera hamwe no gusaranganya mu buryo bungana ku isi yose urukingo rwa COVID-19 kuko ishami ry’umuryango w’abibumbye ryita ku buzima-OMS ariryo riyoboye icyo gikorwa.

Ibihugu birenga 170 biri mu biganiro byo kugira uruhare muri uwo mugambi wo gusaranganya urwo rukingo, wiswe COVAX, ruyobowe na OMS hamwe n’ishyirahamwe Gavi, ryashinzwe n’ikigo cy’umuherwe w’umunyamerika Bill Gate. Ikigo Gavi gishinzwe gukingira abana bo mu bihugu bikennye ku isi.

Umuvugizi wa Perezidanse ya Amerika, White House, Judd Deere yavuze ko Amerika izakomeza gukorana n’amahanga mu kurwanya icyo cyorezo, ariko ko batazakorana na OMS hamwe n’Ubushinwa byamunzwe na ruswa.

Perezida Donald Trump, mu kwezi kwa Karindwi uyu mwaka yatangaje ko akuye Amerika muri OMS, asobanura ko iryo shyirahamwe ryitwaye nabi kuva COVID-19 yaduka, kandi ko ryerekanye ko ryegamiye/ribogamiye ku Bushinwa, aho iki cyorezo cyaturutse mu mpera z’umwaka uheze wa 2019.

Minisiteri y’ububanyi n’amahanga ya Amerika nkuko ijwi rya Amerika ribitangaza, yavuze kuri uyu wa gatatu tariki 2 Nzeri 2020 ko inkunga yayo yo mu 2020 ya miliyoni 62 z’amadolari Amerika yari isigaje gutanga muri OMS uyu mwaka azashyirwa mu mafaranga ONU ikoresha.

Leta zunze ubumwe za Amerika zivuga ko izindi nkunga zagakwiriye guha iri shami ry’umuryango w’abibumbye ryita ku buzima-OMS mu bihe biri imbere zizahabwa abandi bakorana biswe abizerwa.

Munyaneza Theogene / intyoza.com