Kuva tariki 08 Gashyantare 2026, Polisi y’u Rwanda ikorera mu Ntara y’Amajyepfo ku bufatanye n’izindi nzego bari mu bukangurambaga bwo gukumira no kurwanya ibyaha, by’umwihariko Ibinyobwa bitujuje ubuziranenge ndetse n’Ibiyobyabwenge. Litiro zirenga ibihumbi 157(157,048L) z’inzoga zinkorano zitujuje ubuziranenge zarafashwe, ziramenwa ndetse na bamwe mu babarizwa muri ibi bikorwa batabwa muri yombi abanda bacibwa amande.

Polisi y’u Rwanda ikorera mu Ntara y’Amajyepfo, irishimira umusaruro uri kugaragarira muri ubu bukangurambaga yatangije ifatanije n’izindi nzego ndetse n’abaturage bamaze gusobanukirwa ukuri ko gutanga amakuru hagamijwe gukumira no guca burundu inzoga z’inkorano zitujuje ubuziranenge, kanyanga, Urumogi n’ibindi biyobyabwenge byangiza Ubuzima bw’abaturage.

CIP Hassan Kamanzi, Umuvugizi wa Polisi y’u Rwanda mu ntara y’Amajyepfo yabwiye intyoza.com ko kuva tariki 08 Gashyantare 2026 hamaze gufatwa Litiro 157,048 zirimo iza Kanyanga ingana na Litiro 159 za Kanyanga, Ibiro 28 na Boules 506 by’urumogi. Ibi byose ngo byarangijwe( byaramenwe, urumogi ruratwikwa) ndetse Abakekwa kugira uruhare muri ibi bikorwa bigayitse bakaba baratawe muri yombi na Polisi ibashyikiriza RIB.

CIP Hassan Kamanzi, avuga ko ku bufatanye n’izindi nzego hakomejwe Ubukangurambaga ku baturage by’umwihariko urubyiruko, aho ubu bukangurambaga bugamije gukumira ibyaha cyane cyane ibinyobwa bitujuje Ubuziranenge hamwe n’ibiyobyabwenge biyuranye kuko byangiza ubuzima bwa baturarwanda by’umwihariko urubyiruko.

Umuvugizi wa Polisi y’u Rwanda mu Ntara y’Amajyepfo, CIP Hassan Kamanzi avuga ko Polisi ishimira Abaturarwanda bakomeje kurangwa n’umuco mwiza wo kumenyako umutekano ari inshingano rusange, aho bagira uruhare rufatika mu gutangira amakuru ku gihe kandi vuba hagamije gukumira no kurwanya ibyaha.

Polisi kandi, irasaba buri wese kwirinda gukora ibinyuranyije n’amategeko by’umwihariko; Gukora, Gucuruza, Gukwirakwiza, Gutunda, Kunywa Ibinyobwa bitujuje ubuziranenge nka;  Kanyanga ndetse n’Urumogi. Baributswa kandi ko ibyo bikorwa bigize ibyaha bihanwa n’Amategeko, bityo ko Polisi itazigera yihanganira uwo ariwe wese ukora ibinyuranyije n’Amategeko cyane ko amayeri bakoresha, Polisi ikomeje kuyatahura. Uzajya abifatirwamo wese azajya afatwa ashyikirizwe Ubugenzacyaha/RIB amategeko akore akazi kayo.

Théogène Munyaneza