Abagize urugaga Nyarwanda rw’abikorera/PSF mu karere ka Kamonyi kuri uyu wa 08 Gicurasi 2026 bibutse ku nshuro ya 32 Jenoside yakorewe Abatutsi, by’umwihariko abari abacuruzi, abikorera. Bunamiye ndetse bashyira indabo ku rwibutso rw’Akarere ka Kamonyi ruherereye mu Kibuza. Hagawe abikorera bakoresheje amaboko n’umutungu byabo mu kwica Abatutsi, ariko kandi hanashimwa abagize Ubumuntu bakarokora Abatutsi. Abagize uru rugaga rwa PSF, biyemeje kubaka inzu 4 mu Murenge wa Rugalika z’abarokotse Jenoside batishoboye.

Ntiyamira Felix(aka Yadema), Perezida wa PSF Kamonyi mu ijambo rye yagarutse ku bikoreraga bishwe muri Jenoside yakorewe Abatutsi mu 1994, avuga ko benshi bari bazwi ku bw’ibikorwa byabo bakoraga kandi byari bifitiye akamaro abaturage, ariko ngo ibyo bakoraga nta gaciro byari bifite imbere y’abicanyi, cyane ko bamwe banagerageje ku bitanga ngo bagure urupfu, bicwe nibura barashwe ariko nti bikunde.

Ati“ Duteranijwe no Kwibuka abikoreraga n’abandi bakozi bakoranaga bishwe bazizwa ko ari Abatutsi. Aba twibuka, babaye ibimenyabose kubera ibyo bakoraga byakundwaga kandi byagiriraga akamaro benshi, ariko nti byabarengeye kuko ku mujenosideri nta cyari gifite agaciro ku Mututsi kugeza n’aho babitangaga kugira ngo bakunde bagure urupfu, urupfu rw’isasu, barugure ibyabo ariko nabyo nti bibakundire, ahubwo bakabibaka ndetse nabo bakabagerekaho bakabica urupfu rubi, nti babemerere no Kubica urupfu biguriye”.

Yashimiye Perezida wa Repubulika y’u Rwanda, Paul Kagame n’Ingabo zari iza FPR-Inkotanyi bahagaritse Jenoside yakorerwaga Abatutsi, babohora Igihugu ndetse bagarura Ubuzima n’icyizere cyo kubaho kandi neza.

Ntiyamira Felix, agaya bamwe mu bikoreraga bagize uruhare mu kwica Abatutsi. Ati“ Nti twabura kugaya bamwe mu bikorera batubanjirije Igihugu cyahaye ubushobozi aho kubukoresha bacyubaka, bakabukoresha bacyoreka ndetse banagihekura”.

Yakomeje avuga ko nk’ubuyobozi bwa PSF mu karere ka Kamonyi hamwe n’abanyamuryango bayo bazakomeza gufatanya n’ubuyobozi bw’Akarere mu bikorwa byo kwita ku mibereho y’abarokotse Jenoside mu mpande zinyuranye.

Avuga kuri bimwe mu byihutirwa bagiye gukora mu rwego rwo kwita ku barokotse Jenoside, yagize ati“ Tugiye kubakira inzu imiryango ine mu Murenge wa Rugalika ndetse tuzanakomeza uko ubushobozi buzajya bugenda buboneka kandi bwiyongera. Dufite icyizere ko ubwo bushobozi buzaboneka. N’ubu burahari kuko ahari ubushake n’ubushobozi ntabwo bubura kandi ubushake turabufite”.

Uwiringira Marie Josee, Umuyobozi w’Akarere ka Kamonyi wungirije ushinzwe imibereho myiza y’Abaturage yashimiye ubuyobozi bwa PSF Kamonyi ku gutegura Kwibuka ku nshuro ya 32 Jenoside yakorewe Abatutsi.

Yakomeje yibutsa buri wese waje Kwibuka ko“ Kwibuka ni igikorwa cyo gusubiza abazize Jenoside yakorewe Abatutsi agaciro bambuwe no guhumuriza abayirokotse kandi bikaduha n’imbaraga zo kwiyubaka no kubaka Igihugu twifuza, duhangana n’ingaruka za Jenoside zikibangamiye umuryango Nyarwanda muri rusange”.

Yagize kandi ati“ Turibuka kandi twiyubaka kuko hari aho twavuye hari n’aho tugeze kubera imiyoborere myiza. Dushima cyane ubwitange bw’Inkotanyi n’Ingabo zahoze ari iza RPA zahagaritse Jenoside yakorerwaga Abatutsi zikabohora u Rwanda zirangajwe imbere na Nyakubahwa Perezida wa Repubulika, Paul Kagame. Na n’ubu ibyo tugezeho n’ibyo dushima uyu munsi turabikesha ubutwari bw’Inkotanyi zirangajwe imbere n’Intore izirusha intambwe, Nyakubahwa Perezida wa Repubulika, Paul Kagame”.

Visi Meya Uwiringira, yasabye buri wese kwigira ku mateka u Rwanda n’Abanyarwanda banyuzemo, gusuzuma aho Abanyarwanda bageze uyu munsi mu kongera kubaka u Rwanda ruzira Ingengabitekerezo ya Jenoside, ruzira Amacakubiri n’ikindi icyo aricyo cyose cyahungabanya Umusingi w’Ubumwe bw’Abanyarwanda kuko ariwo musingi w’Iterambere rirambye.

Yagize kandi ati“ Dukwiye kwigira ku mateka ya Jenoside yakorewe Abatutsi tukagaya abashoramari n’abikorera bateye inkunga Jenoside yakorewe Abatutsi ariko tukanashima ababaye intwari mu gushyigikira urugamba rwo kubohora Igihugu n’abagize uruhare mu kwiyubaka no gusana Igihugu, aribyo dushimira PSF ya Kamonyi, uburyo idahwema kuba hafi ubuyobozi bw’Akarere mu Rugamba rwo kubaka Igihugu tuba turimo, ndetse n’iyo tugeze mu bikorwa byo Kwibuka no gufata mu mugongo abarokotse Jenoside yakorewe Abatutsi, PSF ya Kamonyi ntabwo ihwema kutwereka ko turi kumwe kandi ubufasha muduha turabubona kandi turabashimiye”.

Visi Meya, yibukije buri wese ko iterambere ry’Igihugu rigomba kujyana no guhora buri wese azirikana Amateka y’Igihugu kugira ngo hato hatazagira usinda Amahoro n’Umutekano akibagirwa ko hari urugamba rwo guhangana n’abatishimiye iterambere n’icyerekezo cyiza u Rwanda rufite.

Yibukije ko ubufatanye bw’Ubuyobozi n’abikorera bukwiye gufasha gukomeza guhangana n’ibibazo bitandukanye bikomoka ku ngaruka z’abakoze Jenoside yakorewe Abatutsi baba abari hirya no hino mu Gihugu bashobora kuba baca mu miyoboro itandukanye kugira ngo basenye igihugu.

Ati“ Turasabwa kugira uruhare rwo kudatega amatwi, no kunyomoza ndetse no kuvuguruza abahakana, abapfobya n’abashaka kubiba Ingengabitekerezo ya Jenoside hirya no hino ku Isi bangisha u Rwanda rwacu Abanyamahanga n’Abanyarwanda bashobora kuba bakiri hanze yarwo”.

Yasabye buri wese guharanira no gushyigikira ibyiza bimaze kugerwaho, guharanira Kwigira, Kurinda ibyagezweho, kubungabunga Umutekano no kugira uruhare mu Iterambere ry’Igihugu ryubakiye ku miyoborere myiza, amahitamo y’Abanyarwanda agakomeza kuba ayo kuba Umwe.

Benedata Zacharie, Perezida wa Ibuka mu Karere ka Kamonyi yakomeje kandi yihanganisha abarokotse Jenoside yakorewe Abatutsi, by’umwihariko abo mu miryango y’abari Abikorera, ashima ko nubwo basigiwe Ibikomere ariko batacitse intege mu gukora, Kwiyubaka no kubaka Igihugu.

Yagize ati“ Turahumuriza imiryango y’abari abikorera, abapfakazi n’impfumbyi zasigaye. Twishimira ko nubwo basigiwe ibikomere bikomeye batacitse intege, Umutima wo kwirinda kwiheba bagakomeza gushaka imibereho n’iterambere niwo murongo ukomeye wo guha icyubahiro abacu bazize Jenoside. Turabashimira ko mwabaye Abagabo n’Abagore b’abanyamurava mukaba mwarabashije kwiyubaka no kubaka Igihugu cyacu mu Rugamba rwo kwigira”.

Yabwiye abagize PSF ati“ Bavandimwe mugize PSF, Inkotanyi mu bwiza si ijambo gusa, ahubwo ni Umurage Inkotanyi zasize mu Gihugu cyacu. Iyo tuvuga ubwiza bw’Inkotanyi nti tuvuga ubwiza bwo hanze ahubwo tuvuga ubwiza bw’Umutima, Ubushake, ubwo guhara amagara kugira ngo abandi babeho, Ubushake bwo kugarura agaciro k’ikiremwa muntu aho cyari cyaraburiwe irengero”.

Akomeza agira ati” Inkotanyi ntabwo zaje zishaka kwihimura, zaje zishaka kubaka. Uwo niwo murage twese tugomba guhora twibuka ko Intsinzi nyayo atari ukunesha umwanzi gusa, ahubwo ari ukuneshesha ikibi Icyiza”. Yakomeje avuga PSF ya Kamonyi berekanye ko atari urugaga rw’ubucuruzi gusa, ahubwo ari umufatanyabikorwa w’imena mu nkingi y’ubumuntu.

Agira ati“ Turashimira ubwitange n’Umutima w’Impuhwe PSF igaragaza mu gutega amatwi no gukemura ibibazo by’abarokotse Jenoside yakorewe Abatutsi muri Kamonyi. Ibikorwa byo kuremera no gufasha imiryango itishoboye byakozwe n’abikorera ni ikimenyetso ntakuka cy’uko Ubumwe bw’abanyarwanda bufite imizi ikomeye ari nayo mizi tuvoma kuri FPR na RPA baturokoye. Turashimira PSF uburyo idahwema gutera inkunga no guherekeza gahunda zose zo kwibuka harimo kubungabunga Inzibutso no gufata mu mugongo abasigaye. Imbaraga n’icyerezo PSF n’abikorera berekana biduha icyizere cy’uko ejo hacu ari heza kandi ko u Rwanda ruzakomeza gutera imbere rwubakiye ku Bumwe, Kwigira no gufatanya”.

Avuga ko nk’abarokotse Jenoside yakorewe Abatutsi baha icyubahiro kihariye n’ishimwe abantu barimo n’abikorera bari bafite ububasha n’ubushobozi bw’amafaranga ariko bagahitamo kurengera Ubuzima aho kubusenya, mu gihe hari abakoresheje amashyi n’amafaranga yabo mu gushyigikira ubwicanyi, kugura intwaro cyangwa guha ingamba abicanyi muri Kamonyi.

Ahamya ko abo bahagaraye gitwari, bagaragaje ko ubutunzi n’ububasha bitagura umutima w’Indangagaciro nzima. Yabashimiye ko batemeye gukururwa n’umuyaga w’urwango rwari rwogeye muri 1994, ko kandi guhagarara ku kuri mu gihe cy’ikigeragezo gikomeye nka Jenoside yakorewe Abatutsi ari ubutwari budasanzwe ko kandi hari ababikoze.

Nyuma yo Kwibuka ku nshuro ya 32 Jenoside yakorewe Abatutsi by’umwihariko abari abikorera, Ubuyobozi bwa Ibuka, ubw’Akarere ndetse na Avega ku rwego rw’Igihugu bagize umwanya wihariye wo kuganira n’Ababyeyi b’Intwaza, barasangira ndetse bungurana ibitekerezo. Bashima Imiyoborere myiza ya Perezida Paul Kagame na Madame Jeannette Kagame ku Kwita ku Ntwanza no kwerekana Igihugu gitandukanye n’icyo babayemo mbere, icyo bahangayikiyemo. Bahamya ko ubu bariho kandi neza, bafite ubuzima n’Igihugu kibitayeho, kibakunda.

Théogène Munyaneza